Sam 85:1-13

¹(Keke kinera tanisa butubutu Kora) Zihova, ele tataru ni na taleoso ni Goi sari na Mua tie pa Mua popoa; ele va mamutu pulea Goi sa butubutu Zekopi.

²Ele va mate pani Goi sari na kinaleadi tadi na Mua tinoni, meke ele taleoso ni Goi sari na dia sinea.

³Ele beto bugoro ni Goi sarini, meke veko pania sa Mua tinaṉaziri koa rini.

⁴Kei Tamasa mami Hinarupu, Mu valeana puleni gami; Mu lopu bugoro ni gami.

⁵Kaqu bugoro lani gami mo Goi si gami ninae rane? Lopu kaqu hite beto tu sa Mua binugoro?

⁶Mu va ṉiṉira pule gami, meke kaqu vahesigo gami na Mua tinoni si Goi.

⁷Kei Zihova, Mu tataruni gami pa Mua tataru nabuna, Mamu harupu gami.

⁸Maqu va avosia kamahire gua sapu kaqu zama nia e Zihova sa Tamasa. Ele va tatarani gita na Nana tie pude koa pa binule, be lopu pule la tavete pulei gita sari na nada sinea.

⁹Hinokara hola sapu kaqu harupi Sa sarini pu va lavatia si Asa, meke kaqu koa turaṉi Sa sari Nana tie pa Nana popoa.

¹⁰Sa tataru nabuna meke sa kinopuna sa zinama te Tamasa si kaqu varigotoi, meke sa tinoṉoto na binule si kaqu vari hapahapai guana tie.

¹¹Kaqu noma sage sa kinopuna sa zinama te Tamasa koari na tie pa pepeso, meke sa Tamasa toṉotona si kaqu doṉo gore mae pa maṉauru.

¹²Kaqu va mamutu gita e Zihova si gita, meke kaqu masuru sari na nada inuma.

¹³Sa tinoṉoto si kaqu mae va kenue koe Zihova meke va nama nia Sa sa Nana siraṉa.