Salmos 85:1-13

¹Corëpita mirajcuna isquirbishan alabansa. Tayta Dios, acrashayqui nasyun runacunawanga allimi goyashcanqui. Jacobpa surtintaga allimanmi ticrachishcanqui.

²Mana allita rurashancunatapis, jucha rurashancunatapis perdunashcanquimi acrashayqui runacunataga. Selah

³Tayta Dios, rabyasha caycashayquipitami alliyashcanqui. Rabyayniquipis päsacashami.

⁴Nogacunata Salbamaj Tayta Dios, yapaypis salbaycamay ari. Amana rabyaynachu ari nogacunapäga.

⁵Nogacunapäga ¿imaypis chaynöllachuraj rabyasha caycanqui?

⁶Acrashayqui runacuna carcaycaptenga ¿manachu cawaycajta cachaycamanquiman? Nogacuna cushicunäpaj ¿manachu cawachimanquiman?

⁷Tayta Dios, nogacunata cuyaycämashayquita musyaycachimay, salbaycamay.

⁸Tayta Diosllatana wiyacushaj. Payga acrashan runacunata alli goyächinanpämi aunisha. Chaura acrashancunaga llutancunata mananami ruranganachu.

⁹Tayta Diosga jananchïchönami caycan rispitajcunata salbananpaj. Payga cay pachacho noganchïwanmi imaypis caycanga.

¹⁰Cuyanacuypis rasun cajpis jucllachacangami. Alli ruraypis jauca goyaypis jucnayllanömi cawanga.

¹¹Allita ruraj Tayta Diosmi syëlupita ricamonga. Chaura runacunanami alli cajllata ruranga.

¹²Quiquin Tayta Diosmi bindisyunninta cay pachaman churamonga. Chaura chacranchïcunachöga micuycuna allimi wayonga.

¹³Alli rurayga willacojninnömi Tayta Dios shamunanpaj ñaupapämonga.