Sam 46:2-9

²Gua asa ke be tava niu sa pepeso, meke soru sari na toqere, meke lodu pa lamana peava,

³meke be puzaka sari na tovovo na ovaṉa sa lamana, meke tava rizu sari na toqere pa tinaṉaziri tanisa lamana, ba lopu kaqu matagutu si gita.

⁴Koanana si keke ovuku sapu sa totolona sa kolona si va qetui sari na tiena sa vasileana nomana tanisa Tamasa lavata, sa vasina hopena sapu koa ia sa Tamasa Ululuna Hola.

⁵Tamasa si koa koasa vasileana nomana sana, ke lopu kaqu boka ta ṉovala si asa. Kaqu tuturei mae pana munumunu vaqasa sa Tamasa pude toka nia sa vasileana lavata sana.

⁶Ṉoveoro pa minatagutu sari na butubutu. Zama si Asa, ke tarazuzu sari na tie koa sa kasia popoa.

⁷E Zihova Tadi na Qeto Minate si somana koa gita. Sa Tamasa te Zekopi sa nada Aqoroana.

⁸Mae mamu dogori sari na tinavete variva matagutudi, pu evaṉi e Zihova pa kasia popoa.

⁹Va nosoi Sa sari na vinaripera pa kasia popoa, moku pani Sa sari na bokala tadi na tie varane, moku va umumi Sa sari na dia hopere, meke sulu pani Sa sari na dia lave varipera.