Sam 35:1-13

¹(Keke kinera te Devita) Kei Zihova, Mu kanai gedi saripu kanaqu rau, Mamu varipera koari pu varipera mae koa rau.

²Mu palekia sa Mua lave na tiṉitoṉa varipera, Mamu mae va sare au.

³Mamu hoperi, na seke ni, karamaho gedi sarini pu korapa hadu luli au. Mu tozi nau sapu kaqu va sare au Goi si rau.

⁴Madi tava kilasa gedi sarini pa kinurekure, sarini pu hatau pude va mate au gua. Madi tava kekere pule pa ninunala si arini pu kukiti nau.

⁵Madi ta givusu palae gua na hikahika huiti, sipu hadu taloa ni sa mateana te Zihova si arini.

⁶Mani tava huporo na gulazoro sa dia siraṉa sipu hadui sa mateana te Zihova si arini.

⁷Ura tavete hobori rini sari na binalabala kaleadi meke va padapada mae ni koa rau. Kekeṉoṉo guana gelia rini sa pou pude va hoqau gua.

⁸Mani raza pule koarini sa tinahuara totoso lopu hite rovea rini. Sari na binalabala kaleadi pu va pada ni rini koa rau si madi raza pule tugo koarini, madi ta huarae gedi vasina.

⁹Meke kaqu qetuqetu nia sa buloqu se Zihova, sina ele harupau Sa koari na qua kana.

¹⁰Pa doduruna sa qua tinoa si kaqu zama la si rau koe Zihova, “Kei Zihova, loke tie si kekeṉoṉo gua Agoi. Va sarei Goi saripu malohoro koari pu ṉiṉira, meke saripu malaṉa si harupi Goi koarini pu ṉoṉovali si arini.”

¹¹Sari na tie va sosode kokohadi si turu mae meke zutu au, koari na tinavete pu lopu hite gilani rau.

¹²Hobe nia kinaleana rini sa qua tinavete leana, ke lodu mate sa maqomaqoqu pa tinalotaṉa.

¹³Ba totoso moho rini si hoke va sagei rau sari na poko baika, meke koa madi pa ginani si rau pa tinalotaṉa. Todoṉo si rau pa vinaravara,