GWAY GI IDAWUU’D 35:1-13

¹Jemi ajem ’kup̱ mo ma, ayy Tap̱a, nyaḵki uni gwansan kun jemki aha/ ’kup̱ mo. Asi ap̱o/ uni gwansan kun askin ap̱o/ aha/ mo ma.

²Bu’thka goŋgoro/ ki me’d mo dhali to mmocesh is mo dhali cuyi mis gom mowoṯẖ pem mo.

³’Deka mee she mis mo dhali ameeny ’ciṯẖ is mo apo/ uni kun urki aha/ isho’k mo. Oyi gwo goma ḵashiram pem mo ki: Aha/ tana man’cuḵ pini mo.

⁴Dhalki uni dhukunu ’te/ ki mo ma ’the is mo dhali ush taḵ mo uni gwansan kun simmki mondiki/em pem e mo. Dhalki uni ṯu’kkunu ka nyaŋ’ko’d mo dhali non ’twa/ mo uni kun p̱ishinki mo gi ’pen mo mmomii tonthus ap̱o/ aha/ mo.

⁵Dhalki uni wana e ka ’pi’b ibwambori ’tham mo ka man’doyu gwo gi Tap̱a ki ur uni ki sule/ sule/ mo.

⁶Dhalki bway buni ta’da ’tum mo dhali dheresa dheres mo, ka man’doyu gwo gi Tap̱a ki ur uni isho’k mo.

⁷Ki dar gi ’kup̱ mii mo tani uni bagkina gumem buni gom aha/ mo. Dhali ki dar gi ’kup̱ mii mo tani uni c̱wanyki jis gom mondiki/em pem mo.

⁸Dhalki mo kun toru sho’k ka pupush p̱u’du’d ap̱o/ uni ki e ka wu mo. Dhalka gumem buni kun baga uni mo tani bu’th uni mo. Dhalki uni ṯa’kkin ibwaman uni mmo’ce’d sho’k ka pupush mo.

⁹Dhali yan’ko’d aḵashiram pem ’kunya bwa e Tap̱a mo mmoyuḵ gway mmomaŋa maŋ gom mony’cuḵ piti mo.

¹⁰Arisa simam pem mini o gwo mo ki: Ayy Tap̱a, kaja a’di jin waki /e mo, /e jin ’cuḵ a’di jin ’ka’da is ki ’ka’d mo ’peni a’di jin ’bitha’bi’th gom a’di mo, dhali a’di jin ’ka’da is dhali a’di jin midi mii ta gi to mo ’peni a’di jin shi/ki a’di is mo.

¹¹Iman/o gwo kun dup̱una dup̱i e mo tani uni cuki mis ap̱o/ aha/ mo. Uni doṯki aha/ to kun ’koka/ ki mish ’ban mo.

¹²Uni ki c̱i aha/ tonthus ka nyaŋ’ko’d gom tom ’borga/ kun miiga/ gom uni mo. Aḵashiram pem a’di ’bushura/ ’bushur mo.

¹³Hili aha/, ki uni ’ba’thkin mo tani – aha/ hi’thkina burrinyen shawaal mo, aha/ shi/kina is pem ki moŋga/ to mo. Aha/ ’thokina ki ’kup̱ pem jin karka/ ka luŋgu’b abor pem mo