SALMOS 46:1-10

¹Toteco Dios ya totlamanahuijca huan tochicahualis. Nimantzi techpalehuía quema onca tlaohuijcayotl.

²Yeca amo timajmahuise masque ni tlaltipactli tlamisosolihuis, huan masque misahuise tepeme hasta itzintla nopa hueyi atl.

³Ma tlacomonijto nopa hueyi atl huan ma posoni miyac. Ma mojmolinica tepeme, pero amo nechmajmatis.

⁴Oncas se atlajtli catli quinmacas paquilistli inijuanti catli itztose ipan ialtepe Toteco. Huan nepa campa más tlatzejtzeloltic itztoc Toteco Catli Más Hueyi.

⁵Toteco Dios mocahua ipan nopa altepetl, huan amo aqui huelis quisosolos. Quema hualase icualancaitacahua, Toteco Dios amo huejcahuas, nimantzi quipalehuis ialtepe.

⁶Masque tlahuejchihuaj masehualme ipan campa hueli tlalme catli amo quiiximatij Toteco, huan masque tlanahuatiani huan ininmasehualhua tzajtzij ica cualantli, amo tleno hueli quichihuase. Quema Toteco Dios camanaltis, quicaquise itoscac catli caquisti quen tlatomoni, huan inijuanti motlancuaquetzase iixpa ica majmajtli. Huan ica icamanal ni tlaltipactli atiyas.

⁷TOTECO Catli Quinyacana Itequihuajcahua Ma Tlatlanitij itztoc tohuaya. Yaya catli techmocuitlahuía ama, yaya iTeco tohuejcapan tata Jacob catli huejcajya itztoya.

⁸Xihualaca xiquitaquij nochi nopa huejhueyi tlamantli catli TOTECO quichijtoc. Quitlamisosolojtoc tlaltipactli huan ama tlatzitzicatoc mocajqui.

⁹Yaya quiquetza nochi tlahuilancayotl hasta campa ontlantoc nochi tlaltipactli. Quipostectoc nochi cuahuitoli huan quisosolo nochi tlamantli para ica tlahuilanase masehualme. Huan quintlatijtoc nochi tlahuilanca carros.

¹⁰Huan yaya quiijtohua: “Ayacmo ximolinica. Ximomacaca cuenta para na niamoTeco Dios. Na niquinnahuatía nochi masehualme ipan campa hueli tlali. Nochi catli itztoque ipan ni tlaltipactli nechhueyitlalise.”