Salmo 46:1-10

¹Si Diyos di pankamangan ya mangipabikas en datako. Kankanayon ay bomadbadang mo waday problema tako.

²Adi tako ngarud emegyat ay iib-a, olay mo mayegyeg din nay ay daga ya din dontog makosokos da ay emey sin lanad di baybay ay annawa.

³Olay abe mo napigsa din dalloyon ya din dontog et pag dan magon-gon.

⁴Ngem wada pay di ginawang ay man-ay-ayos ay mangidawat si ragsak di ipogaw sin siyodad Diyos. Man-ay-ayos ay emey sin beey Diyos ay Kangatoan ay siya din Timplo na ay nasantoan.

⁵Wada si Diyos sin siyodad ay sana, et adi nan itolok ay dadaelen da mo adi et masapsapa ay salaknibana.

⁶Magolo din kailiili begew sin egyat da, ya din aari ay manturturay et maabak da, tan mankali si Diyos yan kaman kido di kali na, et kaman matenaw din nay daga si egyat na.

⁷Si Diyos ay Ap-apon di Sosoldado et wadan datako, si Diyos ay dinaydayaw Jacob et say pankamangan tako.

⁸Omali kayo et ilaen yo san inam-amag na, din kaeetnga ay inam-amag Diyos isnan daga.

⁹Pasaldengen Diyos din gobgobat isnan lota, potlongena din gayang ya pana, din kasay abe yan pooana.

¹⁰“Kosto sa! Isaldeng yo!” kanan di Apo. “Nemnemen yo ay sak-en di Diyos yo. Bigbigen di am-in ay ipogaw ay sak-en di kangatoan. Am-in ay nasyon yan enak iturayan.”