1Rolae pingi dupwa Kamongome mende pyakapya dokona lao pii ketae palyuo lao rae maiyuo karalapape. Banya pii warombo singi dupwa peparae nakama banya kingi lakandalapape.
2Kurulu rambyalu gitape dupwame Anatu dokona ange lao kingi lakando karalapape.
3Banya lao kenane enenge pyao dokopa rambyalu gitape dupwa mora mora piso pyao pii ketae palyuo lao rae maiyuo karalapape.
4Kamongona yulu dupwa angingyuo pao banyapii dupwa kinyi ingyuo silyamo.
5Kamongome rolaena renge dokona mona retelyamopa banya mona retenge ota nange dokome yuu muu peparaena silyamo.
6Yake doko Kamongo baame sinya lao lao wasiya. Neta kana buipi banya piimi sipureya.
7Baame kota pete doko muupyuo yuu mendakisa sinya leya. Baame kota peteme lumu doko minyuo neta epa nana lao mapi pyao kata roko reteya.
8Isa wambu peparaeme Kamongo pakalapape. Yuu muu rae lao palyuo pelene wambu peparaeme baa mupwa lao suu pyao pakale lao karalapape.
9Baame pii leyamo dokopayuu muu peparae ingiya. Dopa pyuo pena leyamopa bange peparae epo maro leya.
10Kamongome yuu liti andake dupwana yulu piramili dupwa kata rokonge. Pirama lao lao rapa rapa pingi dupwa pao kata roko minyilyasa pyuo pee laa nange.
11Dopa pipala baa range pinya lenge dupwa waiya lao mee ingyuo paa napala kulisa ingyuo soo penge.
12Yuu liti andake mende Anatu Kamongo ingyuo pelyamo lao suu pilyaminyi dupwa rae maiyuo parami. Wambu baa rangena lao rombo palyuo nyiya ingilyamo dupwa rae maiyuo parami.
13Kamongome yake dorena karo kandano kandapyamo dokopa wambu peparae kando karamo.
14Banya iso karenge yuu dokona karo isa yuunya wambu palaminyi dupwa kandano kandelyamo.
15Baame nakamana suu pingi dupwa maiyuo dee dopande pilinilyamo lao soo karamo.
16Kiŋi yanda singi malu karaminyipape nakamana porai dokome yandana pyao anamasi minyara ingya nange. Yanda singi mendeme banya porainya renge dokome anamasi minya nange.
17Yanda pela penge mena ose dupwa wua rombasi ingyuo paramosa kapa pyuo wini laa narami. Nakamana porai renge dokome angi mende pii nara.
18Kamongona mona reto karalu karenge dokona baa keta pyamalyuo banya pii warombo soo karenge dupwa baame kandokondali pyuo kandaro karenge.
19Baame kumarami dokona kyawa minyuo karo lopo singi dokopa reto karo pingi.
20Namwa Kamongo keta pyamalyapala karamano lao sepala kararama. Baame namwa nyiso kingi kapeme nee pyuo minyuo papingi.
21Baa karamo dokona lao namwa rae maipala banyakingi poo pyasi doko angingyuo minyilyamano.
22Emba keta mende pira lao mona kare kare karamano. Dokona embena mona retenge renge doko namwa keta palyako puu pena.
