SALMOS 16:7-11

⁷Nimitzhueyichihuas, TOTECO, pampa techconsejomaca. Tlajco yohual techmaca motlalnamiquilis huan technextilía ipan noyolo tlaque monequi nijchihuas.

⁸Nochipa nimoilhuía tlen ta, TOTECO, huan pampa tiitztoc nonechca, amo tleno nopantis.

⁹Yeca ipan noyolo nelía nijpiya paquilistli. Nochi notlacayo motemachijtoc ipan ta.

¹⁰Pampa amo tijcahuas notlacayo ipan ostotl, niyon amo tijcahuas ma palani itlacayo Yaya Catli Tlatzejtzeloltic.

¹¹Technextilis catlique ojtli quipiya nemilistli. Nijpiyas hueyi paquilistli nepa campa ta tiitztoc. Quena, oncas hueyi paquili para nochipa nepa campa monejmac.