SALMOS 144:2-14

²Ḻekze' žeyache' ḻáže'le' neda', na' nake' ka to yo'o gan že' chawa'a. Žon choche' neda', na' žeslé' neda'. Žape chi'e neda', na' žx̱en ḻaža'a Ḻe'. Žone' ga žongak benne' chia' ka' da' žapa' ḻégake'.

³X̱ana' Dios, ¿biẕkze zej nak benne' ka', dan' žejsá' ḻažo'o chégake'? ¿Biẕ zej nak benne' ka' dan' ži'o wnné yoe chégake'?

⁴Zej nak benne' ka' ka to da' ẕnitlen. Zej nak ža chégake' ka to ẕoḻ dan' ẕdezen.

⁵X̱ana' Dios, bsaljw ẕan ya'abá. Betj gákḻeno' neda'. Bta ya'a ẕen ka', na' žoj žen che yi'.

⁶Bzaḻa' yes wzió' ka', na' bsejw x̱nezgak benne' wen da' ẕinnj ka'. Bse yag ntóche'do' chio' ka', na' bžia yi'-gake'.

⁷Gan zo' na'le, bze no'o, na' beslá neda' ḻo da' zedḻe'e gan ži'a. Beslá neda' ḻo na'gak benne' zi'to' ka'.

⁸Benne' ka' ẕnnátezegake' da' wen ḻaže', na' ẕzétjgake' Dios katen' žon ḻáže'gake'.

⁹X̱ana' Dios, goḻkza' chio' to da' kob, na' wgoḻa' da' žóḻ-ḻento'. Ḻen da' žóḻ-ḻento' da' nwan' chi do goḻkza' chio'.

¹⁰Žonkzo' Le' ga žežojgak chawe' benne' wnná bia' ka'. Besló' Dabí, benne' wen žin chio', ḻo ya ntoche' ka' chegak benne' wen da' ẕinnj ka'.

¹¹Beslá neda' ḻo na'gak benne' zi'to' ka'. Benne' ka' ẕnnátezegake' da' wen ḻaže', na' ẕzétjgake' Dios katen' žon ḻáže'gake'.

¹²Ben ga gólegak bi' byo cheto' ka' kan ẕgólegak yag ka' ḻo yo bebe. Ben ga gakgak bi' no'le cheto' ka' ka zej nak yag x̱tanḻe'e ka' nníta'gaken ḻi'a che to yo'o ẕen.

¹³Ben ga cha'gak ližto' ka' yógo'te kwe' linne cheto'. Ben ga chanḻe'e bia yix̱e' cheto' ka', nich gakgak bia yíx̱e'do' zanḻe'e ḻo yežlyó cheto'.

¹⁴Ben ga gakgak beže cheto' ka' bia waḻe ka' nich gónḻe'egakba' žin. Ben ga bi wsángakba' bia že'ndo' ka' kate' bi na' žin byo' chégakba'. Ben ga bi soa no benne' kweže nyache'e ḻo yež cheto'.