Salmo 144:2-14

²Iyan sikandin beliǥeǥawen he Megbevayè ku wey melig-en he elesà. Iyan sikandin eputè ku wey menluluwas ku. Iyan sikandin kelasag ku ne ziyà a te kandin ebuyù te pengalang.

³He Nengazen, hengkey ves is menusiyà? Maan is utew nu sikandin igkeseeng? Menusiyè dà sikandin, maan is kenè nu egkehimu te ed-awà sikandin diyà te isip nu?

⁴Is etew, iring dà sikandin te keramag su meǥaan dà egkaawà is untung din, ne is menge andew zin ne iring dà te alung he edlavey zà.

⁵He Nengazen, puwasi nu is langit ne vulus ka. Semsama nu is menge vuntud wey med-evel.

⁶Gemita nu is menge kilat he iring te panè nu su wey mengekepelaǥuy is menge kuntada ku ne mekedsusuwey zan.

⁷Puun diyan te langit, kewaa a kenikew wey luwasa a puun te ǥehem te menge kuntada he lumelengyawà he memezesen su iring dan te meseleg he zalem.

⁸Wazà tutuu he egkeǥiyen dan. Ne minsan edsesapà sikandan, ne tarù is egkeǥiyen dan.

⁹Egkantahan ku sikew, Megbevayè ku, duma te keduyug te alpa.

¹⁰Kenikew he ketau he mekezaag is menge hadì ne midluwas nu si David te kemetayen.

¹¹Luwasa a te ǥehem te menge kuntada he lumelengyawà, he kenà egkaǥi te tutuu ne edtarùtarù minsan ebpengulivet.

¹²Berakat he is menge anak dey he maama, te vetan-en dan pa ne meiring sikandan te pinemula he mehinuvù. Henduen ded daan is menge anak dey he vahi su iyan maan meiringi zan is menge tukud he mekempet diyà te turuǥan.

¹³Berakat he mepenù is menge budiga zey te langun he kelasi te neraǥun. Berakat he med-anak te mahabet is menge kerehidu zey ziyà te vevesukà.

¹⁴Ne mekergahi is menge vaka zey te zekelà he menge pruduktu. Berakat he kenè key en surunga te menge kuntada zey ne kenè key en mevihag. Ne verakat he wazè en maan menge sineǥawan te egkeseeng diyà te menge zalan dey.