Pesalem 144:2-14

²Eŋ tec kêtu ŋoc balaŋ ma ŋoc tuŋtêna to ŋoc kêsiwaga. Eŋ tec kêtu ŋoc lautuc to ŋoc lamu. Eŋ kêkêŋ tenteŋlatu sêsô aê ŋalabu.

³O Apômtau, ŋamalac kêtôm asageŋ, tec aôm matam gêdiŋ eŋ ma ŋamalac latu tonec kêtôm asageŋ, tec aôm taêm gêjam eŋ nec.

⁴Ŋamalac kêtôm awajaô ma ênê bêc kêtôm gêŋ ŋajaô-jaô.

⁵O Apômtau, ôwê nêm undambê sa ma ôsêp ômôêŋ ma ômoasac lôc gebe jadauŋ êsa.

⁶Ôpalip ôsic mêŋenseŋ êsêac êliŋ-êliŋ. Ôpê nêm sôb ma onsoc êsêac sêc sêna.

⁷Ômêtôc lêmam aŋga lôlôc mêŋôjaŋgo aê su ma ônam aê sa aŋga ŋasamac kapôêŋ aŋga lau jaba lemeŋ.

⁸Lau tonaŋ gêdôŋôlic sêsôm biŋ dansaŋ ma nêŋ anôŋa kêtôc gêŋ geo.

⁹O Anôtô, aê gabe jaŋga wê wakuc teŋ êpi aôm ma jaŋgôm gêŋ wêŋa toŋagam lemelu êtaŋ ma janam wê êndêŋ aôm.

¹⁰Aôm kôpuc kiŋ tôŋ e sêku ŋacjo tulu. Aôm kôjaŋgo nêm sakiŋwaga Dawid su aŋga siŋ ŋaclai.

¹¹Ônam aê sa ma ôjaŋgo aê su aŋga lau jaba lemeŋ. Aŋga lau, taŋ gêdôŋôlic sêsôm biŋ dansaŋ to nêŋ anôŋa têtôc geo naŋ.

¹²Aêac latuŋi lau matac têtôm ka baliŋ ma aêac latuŋio têtôm andu ŋajam-ŋajam ŋaalê poc, taŋ sepeŋ ŋatalô naŋ.

¹³Aêacma andu moŋa gêlôc laŋgwageŋ ma aŋgôŋ gêŋmasê ŋaô gedeŋ tôŋgeŋ. Aêacma domba sêsu ŋalatu tausen to tausen ma tentausen to tentausen seŋ gêŋ sêmoa oba.

¹⁴Aêacma bulimakao sêsu ŋalatu taêsam ma gêŋwapac kêtap sa to sêjam ŋalatu su atom. Lau sêŋgôŋ sênam aucgeŋ, mago taŋiboa ênêc nêŋ malacluŋ atom.