Psalms 144:2-14

²Ir e ma yororiyeg mma rungrung rog, manaf rog nge ta’ayuw rog, ir e ma pagan’ug ngak ni dabi buch ban’en rog. Ma tay e pi nam nga tan pa’ag nggu gagiyeg nagrad.

³SOMOL, girdi’ e mang ni ga ma leam nagrad? Kemus ni gamad bogi girdi’, ma ga ma leam nagmad?

⁴Girdi’ e bod bbuchuth i nifeng; ni pi rran u pulwomad e bod bangi taglul’ ni be yan.

⁵A SOMOL, mu sey e tharmiy nga mub nga but’; mmath ko pi burey nge yib e ath riy.

⁶Mu mateg e uluch nge wereg e to’ogor rom; mu pag e pi gan e gat’ing rom ngar milgad.

⁷Mu ganam u tharmiy nga but’, ngam girngiyeg nggu chuw u fithik e ran nib to’ar, ni dabi buch ban’en rog; mu ayuwegneg u gelngin e pi girdi’ nu boch e nam,

⁸ndariy bingyal’ ni yad ma yog e tin rriyul’ ma yad ma micheg bogi ban’en ni go’ ban.

⁹A Got, bay gon’ reb e tang nib be’ech ngom; bay gu chubeg e harp mu gu tang nigem.

¹⁰Ga ma gagiyegnag nge gel e pi pilung ma ga ma chuweg David ni tapigpig rom u pa’ e riya’.

¹¹Mu ayuwegneg u pa’ e pi to’ogor nma’ngach; mu lageg u pa’ e girdi’ nu boch e nam, ndariy bingyal’ ni yad ma yog e tin riyul’, ma yad ma micheg bogi ban’en ni go’ ban.

¹²Mang e yigi par e pi pagel ni pifakdad ni bod yuke gek’iy nma ilal nib gel. Mang e yigi par e rugod ni pifakdad ni bod yuley i rumog ni bfel’ ya’an ko pi tabthung u tafen e pilung.

¹³Mang e yigi sug e pi naun ni tafen e cha’ar rodad ko gubin mit e wom’ngin e woldug. Mang e yigi yib pifak e pi saf u lan e pi flang rodad ni yu ragag e biyu’.

¹⁴Mang e yigi diyen e pi garbaw rodad nib yo’or pifak ni dabi maraggil ara yim’ reb. Mang e yigi par ndariy e meyor ni fan ko gafgow u lan e yu pa’ i kanawo’ rodad.