Godigo Nogi Ugwaba Sabo Tęąbi Po Wabo Buku Dabe 144:2-14

²Agai te ena godolo ebo God da, tama ena sesemane bobegelalubo dao. Tama aga te geme duala sabo pesage elalu, te ena ma sali. Eno konealubo homu agaba kęą pobaso, tama agai ena bugagia bidimainu ebo dao. Agai te Israel hani isąwai we bidi dabe aiyaba elaluama, ena dologoba munama, bidibo dao.

³Genuai Bidi, da we bidi te magi nai da weyu, tama nago dade homu kone ebawe? Da te olo bage tiwai, tialima magi baso tama nago dade homu wei ebo dawe?

⁴Da te pedauwalide mobo deli sogo naga te pedalubo tiwai ebao. Da te pęwadage sogo naga bidibao, te giligade noma pedelama, tama te polo hagabo tiwai ebao.

⁵Genuai Bidi, nago te dagalu buga sąnama, tama dulao. Te nago nogo te bulu du dabeba mubaso, tama te hano genuai pedelaibao.

⁶Te dagalu be sele pedalumainu elama, tama te boi bidi dabe sela sąyu, tedela palao. Awe, te nago ene baso, tama te augwali wi pomainu yao.

⁷Nago nogo aiyaba munama, tama nago ena te Israel hani isąwai we bidi dabego bomode ma sao, te bidigo nogo aiyaba munama, tama gasa bidi ugwaba keka selama, tama aga te moni wę gede mu bidali tagalobo tiwai yalio.

⁸Te bidi dabego te mu po me wasiąwai, augwaligo te nogo guni sisu muyu, mu po da weyu, tama tibo po dali wabo dao.

⁹God, megi da, eno te gesi balia po nageba waibao. Te eno gita eliyu, tama nageba balia waibao.

¹⁰Nago te Israel hanigo king dabe te hwįbode tau siyu, tama augwaligo te boi bidi dabe aiyaba elalubo dao. Tama dwai boi bidigo ena te moni hwągo elidali weyu, nago naga sę bidi, ena Devit, ma sabo dao.

¹¹Te dwai sę mu ebo boi bidi dabego nogode nago ena ma sao. Tama ena te Israel hani isąwai dabego nogode ma sao. Augwa te mu po me wasiąma, tama augwa te nogo guni sisu muyu, te mu po da weyu, te tibo po dali wabo dao.

¹²Dago homugo te dago ogwa dabe te gesi ogomani te augwali te bomo yai ni dabe tiwai pedalumainu homu ebao. Tama dago homugo te wegi dabe te kingo te genuai be pos au ilibo wiegi yai piksa noma tiwai pedalumainu homu ebao, augwali sawi yai wegi dabe pedalumainao.

¹³Dago homugo te gi dabede te nai hauwa walomai homu elama, tama te nai mubo be mu pągąmainu homu ebao. Tama te sipsip dabego te wai dabe umabo umabo mu ame nomainu homu ebo dao.

¹⁴Tama te bulmakau dabego me te wai dabe hauwa umabo ame nenama, tama te wai dwai me pedalisiąma, tama te me deli isiyu, me eyu egobeo. Dago homugo te dena hanu tomode bidibo bidi me deligo, ma we me deligo me, te sęgę me dene te hanu tomode pedelamuo.