Sale 139

1

23

27

34

51

67

90

95

100

103

110

119

139

¹Deivida niga salena i gilumi. Oo Bada, tam nopougu kwa kitakita, bi kuna sibe kauwegu.

²Tam egu miya bi egu miyamoito kwa sibesibedi, bi kota tam manekemo, bi geḡa te laḡan matabuna egu noḡota kwa sibesibedi.

³Tam laḡan matabuna egu ani nawamo, bi egu ani waiyawasimo kwa kitakitagu. Tam mwali matabudi yà voivoiyedina ba kwa sibesibedi.

⁴Bada, muliḡa kaka yà gagalina, tam kaikana kuna gei sibe te bai yà gagaliye.

⁵Tam maibena ganakuku matagumo bi muligumo, bi em ḡailisimo kwa labelabegu.

⁶Tam sibem lisigumo ba i visu gulata, bi mote luvagu te yà sibe kovim.

⁷Bi em Aluwa mote yàma naile kamaḡe bamo yàma nawa. Bamo mote gabu mainana te yà kandavona. Bamo yà nawana ba laḡan matabuna tam diyagumo!

⁸Bamoda yà saḡa yà nawa malamo ba tam ḡome, bi kota yà nawa lava pekipekidi edi gabumo ba tam kota ḡome.

⁹Bamoda yà lovo yà nawa suwala ena ani lovotavamo, ee ena ani bulumo yà miyana,

¹⁰bi yaḡolo te mba gabunemo nimam yai doligu. Bi em ḡailisimo kwa labewatagu.

¹¹Bi bamoda dudubala yà giuwe te yai kwesi tawagu. Bi kota yana i yanayana waikwaiviviliguna yai dudubala.

¹²Bi geḡa te dudubalina mote luvana te yai kwesi tawagu. Dudubala tam lisimmo ya yanana maibena laḡan. Bi boimatuwa tam lisimmo, maibena yanayana.

¹³Tam tinagu bwaganemo kuna voiyegu, bi siliḡegu kuna pati kaukauwedi.

¹⁴Tagu yà kasaḡesaḡem bi yà vivilem, banina e sibe kauwe te tam bwaga noponemo kuna voiye kaukauwegu.

¹⁵Tam bwaga noponemo siliḡegu kuna sivu kaukauwedi. Bi bwaga noponemo bainewa lofana e miyana tam kuna sibegu.

¹⁶Muliḡa kaka dobumo e tubuḡa bi tam kaikana kuna kitagu. Tagu niga dobunemo egu miya lofana kaikana kuna sibe, bi em bukamo kuna gilumi, muliḡa kaka laḡan ḡemota i waitubu.

¹⁷Oo Maimaituwa em noḡota tagu aubaigu ba a visu, bi tagu mote luvana te matabudi yà sibedi.

¹⁸Tagu mote luvana te yà iyevidi, banina i wapa gulata mote mai gimoli nisa diyanemo. Bi laḡan matabuna dobumo mote yàma tavuḡem, banina tam tagu vaitegu.

¹⁹Oo Maimaituwa tedi mabai gebogebo sa voivoiyena maso kunai pekidi, bi kuna kwavivaidi te maso a gose kamaḡegu.

²⁰Tedi taudidi sa waidiboḡim, bi mote isam sima vivivile.

²¹Oo Bada mabai sa miyamiya tautauliyemna, ba tagu kota yà miya tautauliyedi.

²²Tedi mabai mote sima vivivilem, tedi ba tagu kaguḡaviya.

²³Oo Maimaituwa tam nopogu kwa kita kaukauwe, bi egu noḡota matabudi kwa kita kaukauwedi.

²⁴Bamoda gebogebo bai kuna kita banavina ba kwai lovegu, bi eta kenakena nonoḡinemo kwai dolinawegu.