1Mmko Psamna Deivid igirumi. Yawe God, tam nuwanuwagu kamona kwaginigini bi kwakowa kirakiiyegu.
2Tam kwakovi da awaki raghanine amakeyowogha bo ageghomiiri amiiri. Bagune tam rabarabae, nonowa na yagu noghota kwakakovi.
3Tam apeepewana raghanine na kwakitakitagu bo raghanina yagu bare kamone iiyawiitaveyanana. Tagu sawara tupana aberabera na tam kwakakovi.
4Yawe God, muriyeda ayisisiya na, tam nada kwakovi da awaki anisisiyeni.
5Tamna ware gari naboni kuvitumpipinegu, bi imam debaguve kutore da yam maragatama kwabababaregu.
6Tam akovigu kabina mma naboni na parapa iragata kirakii da gerubana anakovina.
7Tagu gerubana mebo anaverairem ananagho da gekunakitaguna? Getana kubura noko naboni meme. Meghamegha ananono na tam nonowa na nama!
8Meboda anagae abame, na tam nama; Bo meboda anarabobo bi sinadogugu, na tam nama.
9Meboda anarowoghataveyana ananagho raghani matene gabudara yageegeena kuburidiye, bo meboda ananagho raghani didine gabudara yayoyona kuburidiye make biidi
10na tam imam maragasina ininaghovegu, bi katiiyam inababaregu.
11Tagu meboda wiididibara ayawoneni da iyikowoyigu bo yeghana ivitumpipinegu na iyididibara magha
12Bi gegha da bagune wiididibara kamone, tagu gerubana anakowoyemna. Tam biidi wiididibara na parapa yeghanina ware gabudara. Wiididibara da yeghana tam biidi na mayimayiyidi.
13Tam tubuyigu kamona torerereyidi, nuwanuwa da gayama kubera bi sinagunaki raparapane kuvikiikiigu.
14Bi kubera wiimasiyegu kiiravine na iikiikiivem; bagibagi tupadi kwaberabera na waratetedi. Tagu nuwanuwagu tupanama akovi.
15Raghanina irikegu kubera, bi sinagunaki raparapane kutoura yapoyapora, bi name wiikowoye ayaragaragata na tam kwakovi da tagu nama.
16Muriye da ayatubugha na tam kukitagu. Na yagu make yawana gabudaridi kuveregu da anamake, na yam buka kamone kugiruma. Muriye da gabudara dagudaguna iyadagu,
17O God ipiropiro kirakii da tagu yam noghota parapa anakovidi basuna toudi sipeyara kirakii!
18Tagu gerubagu da anakabiyavidina basuna toudi parapa sipeyara, gekikira eghana naboni! Bi tupadi kabiyawa kovidina na, augunai da ayamakewaghata tam naboni!
19God, tagu parapa akayokayoveni da berabero wawayidi kunikasunughana! Kasukasunugha wawayidi gwabiguma kurukwavina tavetaveyana.
20Toudi sisiya berodima sigiboyim; bi kam waghawagha gesiyakabikabi karawayenina.
21O Yawe God, tagu iiyawogha sasinighiiyem na asinighiiyedi, da iiyawogha gesiyakabikabi sisiremna.
22Getana awaki, da nuwapughuma iisinighiighiiyedi, na toudi kagu aviya.
23O God, kita rughuwona da nuwanuwagu kunakita bi kuruyaghagu da yagu noghota kunakovi.
24Bi meboda berabero wawayidi yadi kedagha ananono na kiyevevegu, bi yawa makewaghawaghasina kedane kinaghovegu anapiika tam biidi.
