Sabóor 66:3-20

³Neleen Yàlla: «Yaaka yéemey jaloore! Sa doolee bare, ba say noon rasu,

⁴àddina yépp di la sujjóotal, di la woy, di joobe sa tur.» Selaw.

⁵Dikkleen gis li Yàlla def, jëf la ju yéeme, ñeel doom aadama yi.

⁶Moo soppi géej ag joor, maam ya dox jàll. Nanu ko bége foofa.

⁷Mooy nguuroo njàmbaaram ba fàww, di topp xeet yeek bët. Ku koy diiŋat, yàlla boo damu! Selaw.

⁸Yeen xeet yi, santleen sunu Yàlla, te biral cantam!

⁹Moo sàmm sunu bakkan, te waccu nu, nu tërëf.

¹⁰Éy Yàlla, nattu nga nu, xelli nu, ni ñuy xellee xaalis;

¹¹laaw nga nu, teg nu njàqare.

¹²May nga noon not nu, nu jaare sawara, jaarem ndox; nga génne nu, yaatal nu.

¹³Maay duggaale sa kër ay saraxi rendi-dóomal, defal la samay dige,

¹⁴yi ma waxoon ci sama gémmiñ, sama làmmiñ tudd ko, ba ma jàqee.

¹⁵Jurug yafal, ma defal la saraxu rendi-dóomal, saxar sa jollee ca kuuyu sarax ya, ma boole ca saraxu nag ak sikket. Selaw.

¹⁶Képp ku ragal Yàlla dikkal, déglu, ma limal la li mu ma defal.

¹⁷Moom laa woo wall, àddu, màggal ko.

¹⁸Su ma naroon ñaawtéef, Boroom bi du ma déglu.

¹⁹Waaye Yàlla dégg na ma, teewlu na samag ñaan.

²⁰Cant ñeel na Yàlla, gàntuwul samay ñaan, xañu ma ngoram.