Mitiyegec 66:3-20

³yofi debisia, “Geng wiac angannec, imoc wiac engena yombong, imocac kerectegec andimbe. Ge kucga monggoc, imocac ngabafocga geac bageu kecma ngonducnegecde.

⁴Bangec sasawango geac kicfu ngocducnema numugemma yaiyo kpema yegec heigendae. Yeni geac kpac kuneng heiwayong memima yegec heidae.” Selac

⁵Ngeni hama Anutungo ua meec, imoc hembisia. Ye bangecngicngac nenanggoc kecma ua bibiagoc meude.

⁶Yeng kondung heimerenu bangec kerenga anu ngicngac yeni haningo doku imoc ferecgegec. Ye faka imoc meecac amma nenang sogac sogaigoc kefing.

⁷Ye nasoya nasoya kuhagocngo wiac sasawa garenggema kiwango bangec monnunac ngicngac sasawa yenemma kefude. Yoackpekpe yeni sebingina mi meembisia. Selac

⁸Ngiha ngiha ngeni Anutunina kenehema enac udumengnginango ye oyang boyang ammigec ngicngac yeni negendacbisia.

⁹Yeng garennunuu gbori kecdae, yenigoc kecni ye haninina garenggeu mong mi tiposockenide.

¹⁰O Anutu, imoc yofiac, ngic yeni siriwa isingeandae, geng ifi isoc faitobannu fainunuma isinnununec.

¹¹Ge uficfu fainununa kemeni ge ebic kuneng witininau faina imoc tofohokefing.

¹²Geng negemmana ngic yeneng orucninau tima kenggec. Neni gerec manau kehema dokuu kemema kening, fora. Nga geng yaguc menunuma amabangec tumiatoau fainununa wiac monggac mi obohonide.

¹³Ni womonggau hama sese ohogemma wiac ambadeac dedeseri deai, imoc ambade.

¹⁴Ni ebicfu kecma wiac ambadeac enacbibicnango yoac deserima deai nga yoac enacnango deai, imocac

¹⁵ramaburumaka kerehagoc sese negemma gembade. Nga rama ngiwa sese dema ohoma hosuc heima burumaka nga noning ngiwa gemba sese ambeso. Selac

¹⁶Ngicngac Anutu eweheiheigoc hoanggeandae, ngeni hama yoacna negembisia. Yeng nearu ua meec, imoc edengunuba.

¹⁷Enacbibicnango ye kunengngoc kpacba nedzarannango ye bic afeheec.

¹⁸Ni ngicngac ogofocna memanganeyunubadeac negen negeng herenau arenggebai dede Kebungo neac kedzac mi kpebac.

¹⁹Amma forangoc, Anutungo negennemma nunumunaac yoac negensima kefec.

²⁰Ye nunumuna mi ngadehema yoac nigoc dzegeec, imoc mi waec, imocac Anutu kenehebesonga.