Sabóor 18:10-49

Click on verse(s) to share them!

¹⁰Mu firi asamaan, wàcc, niir yu fatt lal tànk ya.

¹¹Ma nga war malaakam serub, di naaw, daayaarloo laafi ngelaw.

¹²Ma nga bàddoo lëndëm, làqoo, làmboo ndox mu lëndëm aki xàmbaar,

¹³leer a ko jiitu, xàmbaar ya topp ca, ak tawub yuur ak xali sawara.

¹⁴Aji Sax jee dënoo asamaan. Aji Kawe jee àddu, muy tawub yuur ak xali sawara,

¹⁵mu soqiy fitt ak jumi melax, tasaare leen, fëlxe.

¹⁶Aji Sax ji, dangaa gëdd, nokki, mu riir, xuri géej ne fàŋŋ, kenuy suuf ne duŋŋ.

¹⁷Aji Sax jee yóotoo fa kaw, jàpp ma, seppee ma ca xóotey ndox ma,

¹⁸musal ma ca noon yu mag, ya ma bañ te man ma.

¹⁹Ñu dajeek man, bés ba ma jàqee, Aji Sax ji taxawu ma,

²⁰yaatal ma, bége ma, ba xettli ma.

²¹Aji Sax jee ma yool sama njekk, samay loxoo set, mu fey ma.

²²Sàmm naa yooni Aji Sax ji, bonuma, di moy sama Yàlla.

²³Dama ne jàkk ndigalam yépp, xalabuma dogali yoonam.

²⁴May ànd ak moom, di jëfeg mat, di moyoo tooñ.

²⁵Aji Sax jee ma yool sama njekk, rafetlu sama mucc ayib.

²⁶Yaw Aji Sax ji, ku gore, fekk la gore; ku matale, fekk la matale;

²⁷ku sellal, fekk la sell; ku dëng, fekk laak say feem.

²⁸Yaw yaay musal xeet wu néew doole, kuy daŋŋiiral, nga detteel.

²⁹Yaw kay yaa may niital. Aji Sax ji sama Yàllaay leeral sama lëndëm.

³⁰Maak yaw kay, ma song gàngoor. Maak sama Yàlla, ma tëb um tata.

³¹Yàllaa mat. Kàddug Aji Sax jee wér te wóor. Mooy feg képp ku ko làqoo.

³²Ana kuy Yàlla ku moy Aji Sax ji? Ku jara sës ku dul sunu Yàlla?

³³Yàllaa may dooleel, di ma xàllal, yoon mat.

³⁴Moo ma gaawal ni kéwél, taxawal ma fu kawe.

³⁵Moo may tàggat ngir xare, may bank xalag xànjar.

³⁶Aji Sax ji yaa may feg, musal ma, dooleel ma sa loxo, nangul ma, darajaal ma.

³⁷Yaa ma xàllalu yoon, ba duma tërëf.

³⁸Ma dàq noon yi, dab leen, jekkli, doora dëpp.

³⁹Ma jam leen, jógatuñu, xanaa fëlëñu, ma joggi.

⁴⁰Sol nga ma dooley xare, sukkal ñi ma jógal, ñu féete ma suuf.

⁴¹Won nga ma ndoddi noon, ma boole bóom bañ yi.

⁴²Ñu ne wallóoy, wall amul; ñu woo Aji Sax ji, faalewu leen.

⁴³Ma wol, ba ñu doon pënd, ngelaw wal, ma wetti ni banu mbedd.

⁴⁴Xettli nga ma ci bokk yiy fippu, def ma, ma jiite ay xeet; waaso wu ma xamul sax nangul ma,

⁴⁵ku ma ci dégg, déggal ma, ay doomi doxandéem di ma raamal,

⁴⁶ne yàcc, génne seeni tata, di lox.

⁴⁷Aji Sax jeey kiy dund. Kii ma sës a jara sant. Yàlla mi may musal moo màgg!

⁴⁸Mooy Yàlla ji ma feyul, nangulal ma xeet yi.

⁴⁹Xettli nga maak noon, kaweel ma, ma tiim ku ma jógal, xettleeti ma cib soxor.