Psalmaro 18:10-49

¹⁰Kaj Li ekrajdis sur kerubo kaj ekflugis, Kaj Li portiĝis sur la flugiloj de la vento.

¹¹El la mallumo Li faris al Si kovron, Tendon Li faris ĉirkaŭ Si el la mallumo de la akvo, densaj nuboj.

¹²De la brilo antaŭ Li, tra Liaj densaj nuboj, Flugis hajlo kaj brulantaj karboj.

¹³Kaj la Eternulo ektondris en la ĉielo, Kaj la Plejaltulo aŭdigis Sian voĉon; Hajlon kaj brulantajn karbojn.

¹⁴Li ĵetis Siajn sagojn, kaj dispelis ilin; Ĵetis multajn fulmojn, kaj konfuzis ilin.

¹⁵Kaj malkovriĝis la kuŝujoj de la akvoj, Kaj nudiĝis la fundamentoj de la universo, De Via minaca voĉo, ho Eternulo, De la kolera spirado de Via nazo.

¹⁶Li etendas el supre la brakon, kaj prenas min; Li eltiras min el grandaj akvoj;

¹⁷Li savas min de mia potenca malamiko, Kaj de miaj malamantoj, ĉar ili estas pli fortaj ol mi.

¹⁸Ili atingis min en la tago de mia malfeliĉo; Sed la Eternulo fariĝis mia subteno.

¹⁹Kaj Li elkondukis min en vastan lokon; Li liberigis min, ĉar Li estas favora al mi.

²⁰La Eternulo rekompencas min laŭ mia justeco; Laŭ la pureco de miaj manoj Li repagas al mi.

²¹Ĉar mi min tenis je la vojoj de la Eternulo, Kaj mi ne faris malbonon antaŭ mia Dio.

²²Ĉar ĉiuj Liaj leĝoj estis antaŭ mi, Kaj Liajn ordonojn mi ne forigis de mi.

²³Mi estis senkulpa antaŭ Li, Kaj mi gardis min, ke mi ne peku.

²⁴Kaj la Eternulo rekompencis min laŭ mia justeco, Laŭ la pureco de miaj manoj antaŭ Liaj okuloj.

²⁵Kun favorkorulo Vi estas favorkora, Kun piulo Vi estas pia,

²⁶Kun purulo Vi agas laŭ lia pureco, Kaj kun maliculo laŭ lia maliceco.

²⁷Ĉar humilan popolon Vi helpas, Sed altajn okulojn Vi malaltigas.

²⁸Ĉar Vi lumigas mian lumilon; La Eternulo, mia Dio, lumigas mian mallumon.

²⁹Ĉar kun Vi mi forkurigas militistaron, Kaj kun mia Dio mi transsaltas muron.

³⁰La vojo de Dio estas perfekta; La parolo de la Eternulo estas tute pura; Li estas ŝildo por ĉiuj, kiuj Lin fidas.

³¹Ĉar kiu estas Dio, krom la Eternulo? Kaj kiu estas Roko, krom nia Dio?

³²Tiu Dio, kiu ĉirkaŭzonas min per forto Kaj perfektigas mian vojon;

³³Kiu similigas miajn piedojn al cervaj, Kaj starigas min sur miaj altaĵoj;

³⁴Kiu instruas mian manon militi, Kaj miajn brakojn streĉi kupran pafarkon.

³⁵Vi donis al mi la ŝildon de Via savo; Kaj Via dekstra mano subtenas min, Kaj Via favoro min grandigas.

³⁶Vi larĝigas mian paŝon sub mi, Por ke ne ŝanceliĝu miaj piedoj.

³⁷Mi persekutas miajn malamikojn, kaj mi atingas ilin; Kaj mi ne revenas, ĝis mi ilin pereigas.

³⁸Mi ilin frakasas, ke ili ne povas plu leviĝi; Ili falas sub miajn piedojn.

³⁹Vi ĉirkaŭzonas min per forto por la milito; Miajn atakintojn Vi ĵetas sub min.

⁴⁰Vi forkurigas de mi miajn malamikojn, Kaj miajn malamantojn mi ekstermas.

⁴¹Ili krias, sed ne venas helpanto; Al la Eternulo, sed Li ne respondas al ili.

⁴²Mi disflugigas ilin, kiel polvon laŭ la vento; Kiel stratan koton mi ilin forĵetas.

⁴³Vi savas min de popola tumulto; Vi faras min ĉefo de la nacioj; Popolo, kiun mi ne konas, servas min.

⁴⁴Per atentaj oreloj ili obeas min; Aligentuloj respektegas min.

⁴⁵Aligentuloj senfortiĝas, Kaj kuras terurite el siaj fortikaĵoj.

⁴⁶Vivas la Eternulo; kaj benata estu mia Roko; Kaj alte glorata estu la Dio de mia savo:

⁴⁷Tiu Dio, kiu donas al mi venĝon Kaj submetas al mi popolojn,

⁴⁸Kiu savas min de miaj malamikoj, Altigas min super miaj atakintoj, Kaj savas min de perfortulo.

⁴⁹Tial mi gloras Vin, ho Eternulo, inter la popoloj, Kaj pri Via nomo mi kantas.