Sabóor 18:1-17

¹Mu jëm ci njiital jàngkat yi, ñeel Daawuda jaamub Aji Sax ji. Mu jagleel Aji Sax ji woy wii, bés ba mu ko xettlee ci mboolem noonam, xettli ko it ci Buur Sóol. Kàdduy woy yaa ngii.

²Mu ne: Aji Sax ji, maa la sopp, yaw mi may dooleel.

³Aji Sax ji laay sës, mu di ma aar, di ma wallu. Mooy sama Yàlla, ji may sës, yiiru, fegu; mooy Boroom doole ji may musal, di ma làq.

⁴Ki yelloo cant, Aji Sax ji, moom laa woo, mucc ci samay noon.

⁵Buumi ndee tanc ma, walum kasara naq ma,

⁶buumi njaniiw laaw ma, dee ne jaas, di ma fiir.

⁷Ma jàq, woo Aji Sax ji, ne sama Yàlla wallóoy, mu dégge këram. Ma yuuxu, muy dégg.

⁸Mu mer, suuf yëngu, di ker-keri; kenuy tund ya jaayu, di reg-regi.

⁹Saxar di sël-sëlee ca wakkan ya, sawara boye ca gémmiñ ga, xal yu yànj tàkke ca.

¹⁰Mu firi asamaan, wàcc, niir yu fatt lal tànk ya.

¹¹Ma nga war malaakam serub, di naaw, daayaarloo laafi ngelaw.

¹²Ma nga bàddoo lëndëm, làqoo, làmboo ndox mu lëndëm aki xàmbaar,

¹³leer a ko jiitu, xàmbaar ya topp ca, ak tawub yuur ak xali sawara.

¹⁴Aji Sax jee dënoo asamaan. Aji Kawe jee àddu, muy tawub yuur ak xali sawara,

¹⁵mu soqiy fitt ak jumi melax, tasaare leen, fëlxe.

¹⁶Aji Sax ji, dangaa gëdd, nokki, mu riir, xuri géej ne fàŋŋ, kenuy suuf ne duŋŋ.

¹⁷Aji Sax jee yóotoo fa kaw, jàpp ma, seppee ma ca xóotey ndox ma,