Buka Linge 18:1-17

¹Inau tu dolovigho, Lord; Ighoe a nigua na pilupilu.

²A Lord, nigua na vatu ngasi, nigua na bona ni polo, ma nigua na vavola; nigua na God a nigua na vatu, itatana tu topoa na pilupilu. Gaia nigua na tako, te pilupiluu me righitaoniu.

³Inau tu holoa va Lord, te manana na holohaba, na pukuna gaia te vavolau itadira na ghagua na levunimate.

⁴Na alo ni mate te utu talighutiu; mana tave ni tataghalaghi te ghoghoro i vuvungagu.

⁵Na sosodo ni mate te talighutiu; mana ghilu ni mate te talua vaniu na taripiti.

⁶Hauva ta nigua na vahaghitaili inau tu tangi vania va Lord, Eo, inau tu kokoeliulivuti vania va nigua na God ge ke hangau. Gaia te rongoviu mai tana bonana te tabu; nigua na tangi te saravia na kulina.

⁷Vaho na maramana te anu me kahikahi; na panatani na lei ghotu tara aleale; ara anuanu na pukuna nina rutu God.

⁸Na ahu te rughuhoru mai tana ihuna; na lapilapi ni lake mamataghugha te tataghalaghi te sosogha horu mai tana mangana; mana gougovu te bera me vavu te rughuhoru mai tatana.

⁹Gaia te hangavia na kokou me horu mai; na pui tana sara ni marevona.

¹⁰Gaia te haehaghe vuvungana na Cherubim, me lovo dato tana vuvungana na parako nia na ghata ni ghuri.

¹¹Gaia te poroa heghena nia na pui, na pui ni uha te pa ku te talighutia.

¹²Na mararana gaia te tona potaa na pui, me dudura horu mai na lei gougovu ghala.

¹³Vaho a Lord te kokoe horu mai kokou vagha na viviha; na talama ni mangana te haba vule tara rongovia.

¹⁴Gaia te nighi rana lei nina kuali me havukaghinira na ghana levunimate; me nia vetena vania na viti mara hughuhughu poto.

¹⁵Vaho ta nimua na vevetena, Ghe Lord, mi tana pogaana na ghuri ni aheahemu na horara te mamaha, mana banatana na maramana tara pipili lee.

¹⁶Gaia te hagalo horu mai kokou me vavolau, gaia te holakeha datou tana tahi lalo.

¹⁷Gaia te vavolau itadira na ghagua na levunimate mamata ghugha, mi tadira gaira tara niu sika mara lagavuleu.