Romans 10:8-16

⁸Akngey-kenh angka Christ-akert arrer-antey anwekantherr aneyel. Anwantherr angka renh tnaketyek, angka ilerl-apayntetyek.

⁹Ntwa Jesus Atyetyart antwenty, ntwa renh tnakemel, Akngeyelarl renh ipmepenh itethilek, ranemarl ngenh itethilem arrpemarl.

¹⁰Ntwa renh tnakenty, nga ikwerenh-angkwarr arraty anemarl. Ntwa Jesus renh Atyetyart antwenty, Akngeyel ngenh itethilem.

¹¹Akngey-kenh angka arrwekeleny aynteyel Christ-akert, “Ingwerel renh tnakenty, ra nthakenh apatey-angenh apmwewarl irrey-angenh. Akngeyel renh arntarnt-areyel.”

¹²Kel angka nhenh ingkerrenhek aynteyel, Jew-rnemek, ingwer-rnemek, ingkerrenhek-antey. Ingkart anyent impen ingkerrenhek aneyel. Ran ingkerrenh arntarnt-arey-angker rernem renh ayernenty.

¹³Akngey-kenh angka ingwer alakenh aynteyel arrpemarl, “Ingwerel-rnem Ingkart renh ayernenty, Akngeyel renh-rnem itethileyenh.”

¹⁴Rernem Akngey-kenh angka ywarn awem, renh tnakey-angenh, renh ayerney-angenh. Ingwerel-rnem renh-rnem angath-antey akalty-anthenh. Akngey-kenh angka arleng-alenty akalty-anthem.

¹⁵Ingkart-kenh angka awey-angenh akwerrp, angkakert thweney-angenh-antey. Angka Akngey-kenh alakenh aynteyel; angkakert impen apmer arrpanenh-warl alhem, angka mwerr-angker ilerl-apayntetyek. Mwerr-angkwarr rernem angka ilerl-apeyel ingketyel.

¹⁶Israel-kenhel-rnem angka nhenh-angkwarr apentey-angenh. Angkakert Isaiah-el arrwekel-antey ingkwernek, “Ingkartay, angwenhel angka anwekantherrenh-angkwarr apenteyel?”