Roma 10:8-16

⁸Wape fiani aino kaiwone dotu kariria fo mani tonina: “Allai ne kaiwofo waroi weru mea kaha, mae kefang we mea paria, nayai na meboromiwa tuti na menemirorongwai.” Kaiwo nanai aino amewuwuaifa ne, amani kaiwo we inontaraine eroasoai.

⁹Weo masino memadurai na meboromiwa we “Yesusi mani Seng dine,” tuti meroasoai na menemirorongwai we Allai duwiria suwi na marareha rorong foi aha fo mani, Allai feriri mea ki.

¹⁰Weo na taenemirorongfoi taroasoai, ampafe Allai deto tata we inontaraio tabeng riati aha. Tuti tamadurai na taboromine we Yesusi mani Seng dine, ampafe Allai feriri tata.

¹¹Toyari Sempaisi ne Kaiwofo weai dotu tonina: “Mandoni dino yoasoi mani, fiea dohoni mimaya kaha.”

¹²Kaiwo nanai dotu we inontarainesa kiai, weo inontarai Yahudi fosa tuti Yahudi kaha fosa emasi kiai, wiro manei siai weru manei kaha weo ea kiai esobu fariri na eroaso Kristusi fo terai. Weo Seng mansiari foi mani, weSeng we kaiwasanei kiai, tuti inontarai mandoni kontaio eroaso Kristusi tuti esahu na wonongfo mani, mioansa fuba paria.

¹³Weo Kaiwofeai dotu deyo,

¹⁴Wape masino eroasoai kaharai, nana mani esahu we Sempaisi we feririsa todoni? Tuti todoni ambori eroaso mano etaramio kaiwo kariri I kaharai fo? Kontai todoni ambori etaramioai, masino manei wiuwui wesa kaha?

¹⁵Tuti todoni ambori inontarai ewuwu kariri, masino manei demisa kaha? Toyari na Kaiwofo weai dotu tonina:

¹⁶Wape Israelifosa, wiro ea kiai eroaso Kaiwo Mahikai fo kaha. Weo Yesayai medu toninai deyo, “Sengne waune, toyari manei wiro yoaso kaiwo amemadura ne kahaia.”