Romans 10:8-16

⁸Bible-nge Christ-akerte alakenhe angkeme, “Angkentye Ngkarte-kenhe kwenhe arratye arrekantherrele-arlenge aneme, arrantherre kwenhe ikwere-akerte angketyeke, ikwere-akerte itirretyeke-anteye.” Angkentye yanhe-anteye, nhenge Christ arratye itelarentye-akerte-arle, ayeye nhenge rante-rante ayenge-arle akwetethe angkerle-aneme.

⁹Ayenge kwenhe alakenhe angkeme, “Unte apeke arratye ilelheme Jesus-arle alartetye aneme, arratye itelaremele Ngkartele-arle renhe akemelhe-ileke ilweke-arle iperrenge, kele Ngkartele ngenhe itetheke mpwaretyenhenge.”

¹⁰Nhenge anwerne arratye itelaremele kele Ngkarte anteme angkeme anwerne-arle arratye aneme Ikwerenge ularre. Nhenge anwerne arratye ilelhemele Jesus-arle Alartetye aneme, kele Ngkartele anteme anwernenhe itetheke mpwaretyenhenge.

¹¹Arrule anthurre Isaiah-ele pwekeke alakenhe intelhe-ileke, “Angwenhele apeke Renhe arratye itelareme apure-irretyakenhe anetyenhe, Ngkartele-arle renhe arratye itetheke mpwaretyenhenge.”

¹²Kele angkentye nhenhe tyerrtye ingkirrekeke, Jew areyeke, Jew anetyakenhe areyeke. Kenhe Ngkarte kwenhe ingkirrekeke alartetye aneme, nhenge anwerne Renhe apayuthnemele Re anwernenhe mwantyele arntarnte-aretyenhenge.

¹³Nhenhe kwenhe Joel-ele arrule-arle pwekeke intelhe-ileke, “Tyerrtye ingkirrekele Ngkarte apayuthneme-arle itnenhe itetheke mpwaretyeke, Re kwenhe itnenhene itetheke mpwaretyenhenge.”

¹⁴Kenhe nthakenhe-arle-ame itne Renhe apayuthnetyenhe itnenhe itetheke mpwaretyeke itne apeke renhe arratye itelaretyakenhele? Kele nthakenhe-arle-ame itne Renhe arratye itelaretyeke itne apeke angkentye Jesus-akerte awetyakenhele anerrirrekenge? Kele nthakenhe-arle-ame itne angkentye yanhe awetyenhe anwerne apeke itneke iletyakenhenge?

¹⁵Kele nthakenhe-arle-ame anwerne angkentye yanhe iletyenhe Ngkartele-arle apeke anwernenhe yernetye-kwenye? Arrule anthurre arrpenhele pwekeke alakenhe intelhe-ileke, “Nhenge itne apeke tyerrtye ipenye apetyerlenge aremele itneke Angkentye Mwerre iletyeke, kele itne akangkemele anthurre-arle anemele.”

¹⁶Kenhe Jew arrpenhemele Angkentye Mwerre aweke-arle-iperrele renhe irlpe artepele-arle awemele renhe arratye itelaretyakenhele. Arrule anthurre Isaiah-ele alakenhe intelhe-ileke, “Alartetye-aye, angwenhele-ame angkentye arratye itelareke anwerne-arle itneke ileke? Arrangkwe-arle, itne renhe arratye itelaretyakenhe.”