Romans 13

1

2

3

4

5

6

7

8

9

10

11

12

13

14

15

16

¹Atyetyart ilkwernemek awelhetyek. Akngeyel renh-rnem arrernek, rernem ingkerrenhek atyetyart anetyek.

²Ingwer-rnem atyetyart-rnemek irrpelthirrenty, rernem Akngeyek irrpelthirrem arrpemarl. Rernem Akngey-kenh-angkwarr apmwelhilem. Akngeyel renh-rnem ayerneyenh.

³Aray, Akngeyel renh-rnem rnkernek, rernem apmwernemant ater-anthetyek, mwerr-rnem ater-anthey-angenh anetyek. Nga arternp anetyek, atyetyart-rnem-kenh-angkwarr. Ikwer-penh arrantherr arternp anem, ikwer-rnem-kety aterirrey-angenh anetyek.

⁴Atyetyart rernem Akngey-kenh warrkenh aneyel, ngenh mwerr arntarnt-aretyek. Nga apmwangkwarr anenty, nga kel aterirrem atyetyart ikwerety. Ra Akngey-kenh warrkenh aneyel, ranem apmwernem atwey-angker.

⁵Alakenh-anyem nga atyetyart ngkwenhek awelhetyek, ngan irrkngerney awelheyel-angkwarr, ra ngenh atwekerr. Alakenh-anyem iterl-arelhetyek ntwarl mwerr-angkwarr arraty apentenh.

⁶Alakenh-anyem arrantherr tax-areny atyetyart man anthayntetyek. Rernem Akngey-kenh warrkenh-rnem aneyel, rarl renh-rnem arrernek ingkerrenh.

⁷Tax maney anthetyek mwerr-angkwarr. Ntwa man alhelenty, pwekap ngkwenh areyilenty, ntwa renh angkep anthem, atyetyart-rnemek awelhemel arraty-angkwarr.

⁸Angkep antheman, man-rnem-then, ampwal-rnem-then. Alakenh renh arntarnt-arem. Ingwer arntarnt-arenty, Akngey-kenh angka arrwekeleny-angkwarr arraty aneman.

⁹Angka arrwekeleny Akngey-kenh alakenh aynteyel: “Ingwer-kenh anewikw ikngwey-angenh anetyek. Ntwa ingwer ipmek atwey-angenh. Ntwa ampwal ingwer-kenh irrtyertel iney-angenh. Ntwa apmwal ingwer-kenh inetyek iterrey-angenh.” Angka akngerr aynteyel Akngey-kenh-angkwarr. Angka impen nhanyem, “Ingwer-rnem arntarnt-arem, ngkwenh-rnem arntarnt-arem-apeny.”

¹⁰Ingwer-rnem arraty-angkwarr arntarnt-arenty, renh-rnem apmwiley-angenh. Alakenh-angkwarr apententy, kel Akngey-kenh arrwekeleny-angkwarr arraty apenteman.

¹¹Ingkart-kenh arlta arrerirreyelarl-kety, anwantherr arraty-angkwarr apenterl-ayntetyek iterretyek, anwantherr ikwer mpwelhetyek. Arlta ikwerenh arrer-anem, ra ikwerenh-rnem inerl-alpeyek apmer iteth-kenh-warl akngeyneyek.

¹²Ingwerel-rnem apmwangkwarr mpwareyel ingwemerntel. Arltan ikwerenh arrer-anemarl rarl apey-alpeyenhan, ingkerrenhel renh-rnem areyenh, ingwemerntel-apeny aney-angenh. Terangk irrey-angenh, apmwangkwarr alhey-angenh, ingwer-kenh anewikw ikngwey-angenh. Atwerrey-angenh, ingwer-rnemek irrpelthirrey-angenh.

¹⁴Arrantherr Ingkart Jesus Christ-ek iterretyek, ikwer awelhetyek, amentewarl alhey-angenh apmwangkwarr.