Romans 1

1

2

3

4

5

6

7

8

9

10

11

12

13

14

15

16

¹Ayeng Paul, Jesus Christ-kenh warrkenh. Atha pip nhenh arrekantherr-warl thwenek, Akngeyel-anem ayenh rlwanek, angkakert ikwerenh anetyek. Rantey arrpemarl ayenh thwenek, angka mwerr-angker ikwerenh akalty-anthetyek.

²Awank-akerr Akngeyel arrwekeleny-rnem ilek, angka ikwerenh-angkwarr, artwa angkakert rernem angka renh ingkwernek pip-warl. Akngey-kenh angka impen aynteyel.

³Angka mwerr-angker nhenh Akngey-kenh alerikw. Ra arrwekeleny David-kenh arrpemarl ahern-areny.

⁴Ra Akngey-kenh rlterrk-akert aneyel, irrwerl-areny-kenh. Alakenh ra akemirrek ipmepenh Itnweng Rlwartel anwekantherr arrernek. Jesus Christ ranem atyetyart ilkwa anwekantherrenh aneyel.

⁵Jesus-el ayenh angkakert Akngey-kenh mwerr arntarnt-arek. Ra anwenhantherr rlwanek, angka ikwerenh akalty-anthetyek. Ra anwenhantherr arrernek, anwantherr ingkerrenh Jew-weny-rnem akalty-anthetyek apmer arrpanenhek, rernem Jesus-kenh-angkwarr arraty apenterl-ayntetyek, renh tnaketyek.

⁶Ranem arrenhantherr rlwanek, arrantherr ikwerenh-rnem anayntetyek, Jesus-kenh-rnem ingkerr.

⁷Atha pip nhenh thwenek, arrekantherr-warl Rome-areny-rnem-warl. Akngey anwekantherrenh Akngey arrekantherr inkwerelheyel. Ranem arrenhantherr rlwanek, arrantherr ikwerenh-rnem anayntetyek. Ingkart Akngey, Ingkart Jesus Christ arrekantherr inkwerelheyel.

⁸Arrwekel-antey ayeng Akngeyek inkwerelheyel, Jesus Christ-angkwarr, arrekantherr ingkerrenhek. Apmer arrpanenh rernem angkerreyel, arrantherrarl Jesus renh tnakek.

⁹Ayeng intem-antey Akngeyek warrkirreyel, angka Akngey-kenh alerikw akalty-antheyel. Akngeyan akalty, ayeng arraty angkeyel. Ayeng arrekantherr iylpangkeyel iylpelirrey-angenh, Akngey renh ayernemel. Ayeng arrekantherr-warl alhetyek-anek. Ayeng apetyem, Akngey ilkelhentyarlant.

¹¹Ayeng ilkelheyel, arrekantherr-warl alhetyek, atha arrenhantherr rlterrkiletyek, arrantherr arraty-angkwarr apenterl-ayntetyek. Alakenh-anyem anwantherr rlterrkilerrerl-ayntetyek, ikwerenh-angkwarr arraty apenterl-ayntetyek

¹³Atyenh-rnemay, ayeng arrekantherr-warl alhetyek-arrpantey, ywarn-antey. Akngey atyeng arrkngert angkek. Ayeng ilkelheyel, atha Rome-areny-rnem Jesus-warl atnwenhetyek, atha Jew-weny ingwer-rnem Jesus-warl atnwenhek-apeny, apmer arrpanenhek.

¹⁴Iterl-aray, atha ingkerrenhek angka mwerr-angker ingkerrenhek iletyek, tyak-rnemek-then, akwerrp-rnem-then akalty-anthetyek, apmwamwam-rnem-then ingkerrenhek akalty-anthetyek, atyenh-angkwarr-antey.

¹⁵Alakenh ayeng iterrenh angka mwerr renh iletyek, Rome-areny-rnem.

¹⁶Ayeng Akngey-kenh angkekety nyerrirrey-angenh. Angka Akngey-kenh-angkwarr anwantherr itethirreman, iteth-kenh apmer-warl alpem, anwantherr renh tnakenty. Jew rernem-tangkwel arrwekel anenh, akalty-anthenh, ingwerel-rnem-anem, apmer arrpanenhek-anem.

¹⁷Angka mwerr-angker alakenh aynteyel, ingwerel Jesus renh tnakenty, ra Akngey-kenh-angkwarrant anem. Akngey-kenh angka alakenh aynteyel: “Ingwer Akngeyek awelhenty, ra Akngey-angkwarr arraty aneman, ra iteth intem-antey anayntetyek, Akngey-kenh-angkwarr.”

¹⁸Akngey-kety amentirrenty apmwangkwarr irrem. Intwemelirrenty Akngey-kety ikwer-rnem aynteyel arrpemarl, atwetyek. Alakenh ingwer-rnem Akngey-kety arrkngert angkenty, Akngey renh iterl-aretyek, Akngey ikwer-rnem-kety ahelirrem. Ranem renh-rnem atwem.

¹⁹Ra ikwer-rnem ahelirrem, rernem arraty-angkwarr apentey-angenh-they, rernem ikwer awelhey-angenh-they. Kel rernem iterl-areyel rarl iwerr arratyilek ikwer-rnem.

²⁰Ran rlterrk ilkwakert aneyel, ahern-then alker-then arrpmernemel. Alakenh-they ingkerrenhel areyel-anem. Rernem ikwer iterreyel.

²¹Rernem Akngeyek akalty anem, rernem renh tnakey-angenh, ikwer inkwerelhey-angenh. Rernem ilpertilelhenh, apmwangkwarr. Rernem apatemel anew-aneyel.

²²Rernem tnakelheyel akalty-arrpantey. Rernem akwerrp iterl-arey-angenh.

²³Rernem Akngey rlterrk inngekety intwemelirrek, rernem apwert-penh ingkerr artwapeny mpwarek, thip-apeny mpwarek, atnwenth-apeny mpwarek, rtnwem-apeny-then mpwarek, ikwerant-anem inkwerelhenh. Rernem arrangkwarl, ahern-areny-kenhant inkwerelhek.

²⁴Alakenh-anyem Akngeyel renh-rnem menty-anem tyarlewek, rernem ingwer-rnem ikngwetyek angwenhirreyel, ament-warl apmwangkwarr alhetyek.

²⁵Rernem Akngey-kenh-angkwarr arraty iterl-arey-angenh. Rernem irrtywerreyelarl ahern-arenyek inkwerelheyel, ampwal apwert-penh arwerl-penh arnwarnekarl. Anwantherr Akngey renhant tnaketyek. Amen.

²⁶Alakenh-anyem Akngeyel menty-anem tyarlewek, rernem apmwangkwarr apenterl-ayntetyek. Arelh ingwer arelhant-atherr, artwekety arlkarirreyel, iteng-apeny anayntetyek.

²⁷Artwa ingwer-rnem arelh-kety arlkarirreyel. Artwant-atherr, iteng-atherr-apeny. Rernem apmwangkwarr mpwarenty, Akngeyel renh-rnem atwemarl.

²⁸Rernem Akngey-kenh-angkwarr-kety arlkarirrenh. Akngeyel renh-rnem menty-anem tyarlewem, rernem apmwangkwarr ikwer-rnem-kenh-angkwarrant apenterl-ayntetyek.

²⁹Rernem apmwangkwarrant apenteyel, rernem arnkaty. Rernem ingwer-rnem-kety arlkarirreyel. Rernem ingwer-rnem ipmek atwem. Rernem ingwer-rnemek irrtywerl-amperneyel, irrtywerremel ileyel. Rernem ingwer-rnemek irrwernelheyel. Rernem ingwer-rnem ilteyel. Rernem ingwer-rnemek angka akngerrileyel irrtywerremel.

³⁰Rernem ingwer-rnem ayntarrp-ileyel ikwer-rnem tyel-angkerreyel. Rernem ament-warl alheyel, tnakelhemel. Rernem Akngey-kety arlkarirreyel. Rernem ikwer irrpelthirreyel. Rernem aynikwek-then amikwek-then awelhey-angenh, inkwerelhey-angenh.

³¹Rernem arwengkirreyel, rernem irrtywerreyel apek, rernem ingwer-rnemek amperrngirrey-angenh apek, rernem nthakenh ingwerenty amek-arey-angenh.

³²Rernem kel akalty, Akngey angkek-angkwarr-antey, ra apmwangkwarr alheyel-rnem-kety ipmelhem. Rernem apmwangkwarr arternp anerl-anem. Rernem ingwer-rnem rwewileyel apmwangkwarr ingkerr rernem anayntetyek.