Romo 10:8-16

⁸Jibe na, kito romijikia rosian verdop̃eiano na vikadeniano nalo na, rover iliano dolu tai napano Mosis ber nua, napano berinavo Atua kiano iliano ban kito kulorinio naio jo bija kito ruei. Jua jum̃ado ruei, ana romijikia rodu toa niodo, romijikia rodu vatitigio toa kiado jidomiano. A Atua kiano iliano napano iliano nene beriio, nina Ioluano Vou napano kumemi numitu numioliolu kanio, napano berialio ka tomu nalo monoka amonea Yesu Kristo.

⁹A jau kei napano komonea Yesu Kristo ea kiamo iviso, kober ka Atua mila naio meul bereio ea m̃ariano, a kojaaro ka koverialio ea vio reraio ka jau komidu Yesu jibe kiamo Tubo, mia jau kovokar meuliano.

¹⁰Nina bior napano toro na biekouo ea kiano iviso ka Yesu meul bereio ea m̃ariano, a berialio ea vio reraio ka Yesu be kiano Tubo, mia Atua sian re bunu vironiano van naio kar kiano kariano nalo, mia rilarur naio.

¹¹Nina jibe iliano tai ea Vivitauiano Lu re nua, napano jibe ka napano beriio napano romonea Kristo, napano berinavo Toro napano monea naio, naio maka rijikia rijog kiano jidomiano rijoru bogo tai.

¹²Mia toro napano monea ka naio be Ju, p̃eli maka rive Ju, mia Tubo naio takurano be kialo tubo abiniu, mila bo kalo abiniu ga napano ajegi banio naio.

¹³Nina jibe iliano tai napano Naverialiano Joel nua bivitauia, napano berinavo “Toro kei napano bio Tubo siano, mia rilarur naio.”

¹⁴Be riano, kulo Ju miroano maka avio van Kristo ka rilarurlo, a jum̃abe jibe na? Nina bior napano maka ajikia avio naio verver maka amonea naio, a maka ajikia amonea naio verver maka leleio ajog siano vo, a maka ajikia ajog siano verver maka toro tai rioliolu ka vanlo.

¹⁵A maka jikia toro riva rioliolu verver Atua maka riilaio ka rivano, a verver naio jaaro ka rivano, mia tibe na napano Vivitauiano Lu berenio ruei, napano ber “Siva toru ka Atua napano kiano naverialiano nalo, romijog jaalo aju amijubariva ea kialo m̃arabo ninio nalo ka avanvan tanea vio vija kiano Ioluano Vou.”

¹⁶Nina naruei iliano napano tom tealo aberenio, a nemijikia never makanio, Atua jo miila kiano naverialiano nalo abanvan ruei, mia aua toru napano Ju nalo miroano maka asidom ajogio ga. Nina jakii iliano tai ea Vivitauiano Lu bereio, napano Naverialiano Aisea jegi ban Atua, ber “O Tubo, kumemi numitu numioliolu ka kiamo iliano banbano-o, mia jibe napano maka toro tai rive tinieno ka rijogio.”