8Taasaxa, a mataa aava namkai, a ferawai malaan: “A ferawaian aanabeꞌ a waan faasilak, tuuna a waan la xunus imi e la valami.” A ferawaian sena namkaian aanabeꞌ a lagasai aava maam fuuna fepitaa pana.
9A fepitaian simaam a malaan: layaan no kuus fasavat o “Yesus ve a Memai” e layaan mi namkai la xunus imi o a Piran a fatatoi faꞌulie ti la mamaat- lana yaan fatak aave a Piran i taa fakaxup nami.
10Senaso mi tigina fatak la matana Piran layaan mi namkai la xunus imi e mi fakaxupan layaan mi kuusan fasavate pana valami.
11Taara texaas sena, senaso a Xakalayan Taap a kuus, “Naseꞌ ta mataa a lisan tuunei nane xa xe si Yesus aava Memai sitaara, i taa pife famangilan.”
12A mu Juda e nari aava ri pife Juda ri fexaxaas la matana Piran senaso na Yesus va Memai siri xapiak e a xavang marasaxain naseꞌ ta mataa a fenung xe sina.
13Senaso lana Xakalayan Taap a kuus malaan: “Naseꞌ ta mataa a fenung xe sina Memai pana xakaavangan sina, a Memai i taa fakaxupe.”
14Naak saxa i taa fiai, “A mu rabuna, ri taa fenung xe sina Saxa aava ri pife namkai sena, malaafaa? E ri taa namkai sena Saxa aava ri pife texaas sena, malaafaa? E malaafaa ri taa texaas sena tamo piau ta mataa xena kuusan fasavate xe siri?
15E malaafaa ri taa kuusan fasavate tamo piau ta saxa xena feng nari?” Ne taa sui nari aava ri fiai malaan o a Xakalayan Taap a kuus malaan: “A filimaanan sina rabuna aava ri lisan a Lagasai Roxo sina Piran a fafaamamaas netaara.”
16Ri fo langai xo taasaxa saxanofuna ri pife turoxo pana Lagasai Roxo se Krais. E taara texaas o ri pife turoxo pana senaso na Aisaia a kuus malaan lana xakalayan sina: “Memai, naseꞌ fo namkai sena lagasai sitaare?.”
Rom 10
Rom 10:8-16