Rom 3:1-19

¹Na tikiŋit kakatacna tɨpna kirara, anmo tikna reac niŋgik ecte, ainda mo te, Iudananda kabena meikramtaɨrmo titoca kunni laruit? Na kaina reac laŋa ndo tikiŋit kakatacna reacna kirar toc ndaruit?

²Kaica! Raraŋ Aetaniaca Iudanandmo, reik laiŋga neaŋga mamaiat, na out ŋgoinna gaind, Raraŋ Aetaniaca ndona kamma Iudanandmo neaŋgatna, te, mina anmo raupŋina.

³Na anna gidik, ndeida an kamma mba raŋgaiatke. Na kaica? Na mina anna rɨpac kocor te, anna moca Raraŋ Aetaniaca ndona kamma raŋgainandet ki?

⁴Wanaiŋ ŋgoin, meikramtaɨr muruŋa parurenan, na Raraŋ Aetaniac man kabe, ma ndo kam gidikca memetmbacmo ndoprena. Ainda moca Raraŋ Aetaniacna Timbigta Kapca gaindopatna, “Raraŋ Aetaniac, u ndona kirar wandoŋa raŋgaica u aukmo ritri waparaca mo. Na mina umo ritri waparaca mona ndop te. U mbopi pɨarkena mɨn, na u makukar kocor.”

⁵Na titoca mo te? Aina tɨpemb kirarir ŋgorikca, Raraŋ Aetaniacna tɨp kirar wandoŋmo raekca wandac te, aia anmo titoca mbopit? Na an mɨn Raraŋ Aetaniaca aina tɨpemb ŋgorikta makukarmo opoik ŋgoreac anna ruti te, anna ma tɨpna kirar ŋgoreaca moapek ki, a? Wanaiŋ ŋgoin. Na ainta iroar landamŋiara, anna aina meikramtaɨrta iroar tiŋgik puŋga tarurena. Na Raraŋ Aetaniac, ma tɨpna kirar wandoŋa memetmbaca raŋgai ŋgocor te, titoca tɨkca ma meikramtaɨr muruŋna ritri waparaca moit?

⁷Na anna ramootta ndona iro mbuŋ ndoprena kamna kirar toca aindoprena, “Aukna paparuna kamma Raraŋ Aetaniacna kam gidikmo moi laru te, anna mana i aniac aŋgɨra ŋgeprenan ŋgoin, na kaica ma aukmo an tɨp ŋgoreacna makukca morena ramoot ndopca, na ma aukmo an opoik ŋgoreac neaŋna moek?”

⁸Na aind tocna kamna tɨpna kirara gan peperena kam ŋgoreac toco gaindoprena, “Aria, aia tɨp ŋgoreaca mona, an tɨpna kirar mbuŋa taup laŋa larunande.” Na ramtaɨr ndeida paparuna kamma aukmo niŋgea gaindoprena, kamma aku ndo wiwitirenan, anna ma an peperena kam ŋgoreacna kirar toc. Na Raraŋ Aetaniaca ma an meikramtaɨrta ritri waparaca moca mina morena tɨpemb kirarir ŋgorikta opoik ŋgorik neaŋnande.

⁹Na kaica? Ŋarikca aia Iudananda, kabena meikramtaɨrmo tamuŋ ŋgoin ki? Wanaiŋ ŋgoin. Na aia mboprina tɨp ŋgoreacna makukca aimo Iudananapa, aimo Iudana meikramtaɨr wanaiŋ ndeacrena meikramtaɨrap, aimo muruŋa wɨŋga kɨtaca eacrena.

¹⁰Na Raraŋ Aetaniacna Timbigta Kapna kamma gan kammo gaindoprina, “Ramoot ianna tɨp kirar wandoŋa mba morenanna. Wanaiŋ ŋgoin.

¹¹Na ramoot ianna landamŋi laiŋ kocor. Na ramoot ianna Raraŋ Aetaniacna orena aiŋa mo ŋgocor.

¹²Na mina muruŋcamiŋa mina taup laŋa tɨkcaririna, na mina muruŋa kirar kabe toc ŋgoin. Na mina muruŋa ŋgoreac ŋgoin. Na mina ianna tɨp kirar laŋ ianap mba morenanna. Wanaiŋ ŋgoin.

¹³Na mina upna kamma anna mukca tɨŋ gootta eacrena kirar toc. Na mina paparuna kamb ndoprenan. Na mina upembca ramootta mo ŋgocraina kambca tɨkrena, na anna nduop ŋgoreacna kocna kirar toc.

¹⁴Na memetmbaca mina kabena meacramootmo moi ŋgocraina kam ndop te, minmo makukar neaŋna kam ŋgoreaca an ndoprena.

¹⁵Na memetmbaca mina kabena meacramoota rɨŋ menacna ootta taŋrena.

¹⁶Na mina wanaiŋa taŋreke, meikramtaɨra mo ŋgocraina reikca moca mina eteacna watta mo ŋgocraica minmo makukca neaŋnande.

¹⁷Na mina kabena meikramtaɨrmo, nikinik iroar wewettar momona kirara mina mba lamŋirenanna.

¹⁸Na mina Raraŋ Aetaniac nake, rugutta mba morenanna.”

¹⁹Na aia lamŋirena, an kambca muruŋa Tɨp Wandɨkca moatnan, anna ma meikramtaɨra Tɨp Wandɨkna kaŋgaukca eacrenanna neaŋrinan. Ainda moca ramoot ianna gaindopna mɨnna wanaiŋ, “Aku ramoot wandoŋ laŋ.” Wanaiŋ. Aia tenten ndeacrena meikramtaɨr aia muruŋa Raraŋ Aetaniacna lamnɨacmo aia laŋa mba eacreke.