Rom 3:1-19

¹Nomo Juda te, ankwap fi aropan kámákár tukup námp nie? Am yɨpi fárákapnap nɨnɨk te am mek tére kwapwe yak námp ni mo nie?

²Wakwe! Waeman Kwaro Judan nkwakwe make kwapwe kare ankank nénk námpon. Ankárank te, Kwaro wokwaek kar Juda fi nomwan náráp kar sánkámp te, fwapia taokeyakáp mwanapria nimpon.

³Kareno, Juda ankwap fárákap am kar nɨkia paokop mo napon. Am tak napo te, Kwaro námoku sérimp kar am te mántwaok mo, wampwe pwar naenámp nie?

⁴Mo karono. Arop ponankor te kwekár i konapan maok, Kwar ankárankao saráp kare kar sér i konámpon. Am te Kwaromp Buk fek arakrá sénámp niampon: “Kwar e! Amo te yae-párák kare nɨnɨk fek onan kot napono. Tá amwan kot mwaria nɨnɨk napo te, amo am kot kwe-pwar nanapon.”

⁵Ono aropamp nɨnɨk niamp fek sénae nae: Nomp nɨnɨk kwataerao Kwaromp nɨnɨk kwapwe kare érik yénkép nánko te, nomo te apaerá sér mwanámpon? Kwar te nopok onomp kwatae nɨnɨk fek touwe sáp námp te ‘Am te pwi mo námpon’rá sér mwanámp nie? Mo karono! Kwar te yae-párák mo námp kwamp te, mokopiaka ponankor aropamp nɨnɨk younkoup naenámpon?

⁷Arop ankwapao arakrá sénaeane: Ono kwekár nampao, Kwaromp kar kareran érik yénkép nanko, maomp e sakap napo, tokwae kari yak nánko te, apae riteaka Kwaro onan, amo te kwatae aroponoria am fek touwe kwatae sáp naenámpon?

⁸Arop ankwap fárákapao onan wouroumprá kwekárrá sérrá, “Polo arakrá sénámpon, ‘Ae! Nomo kwatae nɨnɨkan kor sámpea paokopria, am fek Kwaromp kwapwe kare nɨnɨkan érik yénkép mwanámpon.’” Aerapan maok, am nɨnɨk te kwapwe kare nie? Kwatae kareno. Makrá sérarnap aropan te Kwaro waeman yae-párák kare nɨnɨk fek am fárákapan kot naenámpon.

⁹Kwaro Juda fi nomwan warákárria, arop ankwap firan warákár mo námp ni, mokopono? Ono wokwaek arakrá séri nampon: Juda nomokuia maok, arop ankwap firao kor ponankor mént ankár kwatae nɨnɨk fek saráp yakáp námpon.

¹⁰Kwaromp Buk fekamp karao sérrá, “Arop ankwap yae-párák kare nɨnɨk i konámp arop yak mo karenono.

¹¹Arop ankwap yae-párák kare nɨnɨk fi fwapia mér mo, Tá arop ankwap Kwarén oupourounk námp yak mono.

¹²Arop ponankor Kwarén te wae pwate napono. Arop ponankor ankárankamp pourouráp fek kwatae kare arop yakáp napono. Am ou mekamp arop ankwap kwapwe kare nɨnɨk mo kare napon.

¹³Am fárákapamp kar kwatae sérarnap top kor te arop papnap apár me kɨkɨr akwap nánko, mákáre aok konámp niampi napon. Am fárákapamp táp meknámp te kápae kare kwekár kar sér i konapono. Am fárákapamp táp mekamp kar touwe te karnaerao arop yamp nánko, sumpwi konámp niampao top koupouri yak námpon.

¹⁴Aropamp nɨnɨk mek touwe sánknámp kar sérar i konapon.”

¹⁵“Koupour yopor yonkwae pwarámpria arop ankwap tirá wour i konapon.

¹⁶Ankár takrá paokopria maok, Kápae kare aropan nkwakwe make sokororia maomp ankankan kor souroumpoura waerá nɨnɨk mek kápae fápárámprá kák napon.

¹⁷Ankwap fákárerént ankárankamp nɨnɨk fek yakáp i konap nɨnɨk te mér mo napon.

¹⁸Kwaro námwan naeanria kánanke apáp mo i konapon.”

¹⁹Nomo te wae mér, má kápae kare kar lorao sénámp te, loramp yae ankore mek yakápnap arop fárákapan sénámpon. Aenámpara, arop ankárankao sérrá, ‘Ono te kwapwe kare aropono’rá sénaenámp pourou mo kareno. Apár-apár ponankor mekamp ponankor arop te waeman Kwaro nke námp fek te kwatae nɨnɨki tenámpon.