Rom 3:1-19

¹Juda dana age cel jicna Juda dana qee eundec wooladegina? Cel ceteh me eu dewenega cagu qoc kobolna calena?

²Ese, ceteteh me bahic mati calen. Casac ceteh me bahic oso eu odi, Anut uqana je Juda cofdoqagannu aden.

³Mele, leih age je eu qee toodoloin. Euqa eu adi? Age Anutna je qee toodoloinfi Anut uqaha uqana je qee toodoiaunfo?

⁴Qee bahic! Anutna jaqec je odi madena: “O Anut, hinana je cunug eu mele bahic dana cunug eu fegina. Odocob hinana je eu gesilifeig hinana je eu tutuc himec foqagan,” ena. Eunu dana cunug age uhulegina qa Anut uqa himec saen gaid je mele madena.

⁵Odocob eu adi? Egena kobol tutuc qee eu Anutna kobol tutuc bahic eu camasac mudecebfi ege adi madeqan? Ege madi, Anut ameg me qee wadacgena eunu uqana kobol eu tutuc qee, eqanfo? (Ija danana cisdoc himec toodudu madiga.)

⁶Qee bahic! Anut uqa ititom qeefi dana cajaca agena kobol adi gesiligian?

⁷Dana leih age madegina, “Ijana uhulec je Anutna je mele camasac mudecebfi odocob eu uqa binan sulec mahamaha ihoc lifei uqa cain gesiltimei ija silail dana imei ameg me qeena wadacteiaun,” egina.

⁸Odocob dana oso madigian, “Ege kobol me qee odoqa qa odocob kobol me euna caligian,” igian. Eu dana leih age ijanu um qu mamadi ijana me je madec eunu je me qee i ec madegina. Dana eu age wadacadec ameg me qee oqagan eu mele bahic.

⁹Odocob eu adi? Ege Juda dana Juda dana qee eundec wooladecfo? Qee bahic! Ija wele maadiga, silail ege dana cunug cilehgen, Juda danaca Juda dana qee eundecca cunug.

¹⁰Anutna jaqec je odi madena: “Ititom coboc dana oso maha ina qee bilel.

¹¹Dana oso uqa fogo docca qee. Oso uqa Anut megec cabi qee ona.

¹²Cunug age jic me eu culein. Cunugca odi age dana me qee bahic calein. Osol oso ha kobol me qee odona.

¹³Age conoga eu qalqal heel cebec cinigwe. Age beilamagana age uhulec je madegina. Age biamaga dunuh eu man sononec agena ceeh sahalic me qeeca.

¹⁴Age je me qee gulihinca conogana gaid madegina.

¹⁵Age dana qagadocnu mahuc bahic gugulegina.

¹⁶Saen cunug age ceteteh me qee mumudi culumen geh dana adegina.

¹⁷Age dana malol bilec kobol qee toodogina.

¹⁸Age Anutnu cumunec nag odi qee dogina,” ena.

¹⁹Odocob ege doqona, Mosesna loo je eu uqa egena silail eu himec ihacgena, eunu dana oso uqa ija dana ititom ec madecwe qee. Eunu cel je loo je madena eu dana cunug age je madecwe qee bilimeig dana maha cunugnadec ege Anut amegna cahuldocca biluquna ec madoqagannu eu dana loo je bisalu bilegina eu age maadena.