RUUMIYA 3:1-19

¹Haali/ a’di gi wakan mo tani shi/ miim ’boro’da ta itana ’Kwani Yahuuda/ mo sa/? Walla tonta igama she/ mo mmo’ciṯẖuwa munyjal yis mo sa/?

²Shi/ miim ’boro’d ’teki nyanye/ mo be. To jin ṯelkika/ ’pen a’dan be ki ’Kwani Yahuuda/ c̱inu gwo ma Arumgimis kun ’kwarkunu mo.

³Dhali gwo wakata waḵki/ kun tiya dar gi gwo jin gamu is mo? Mmo’kona uni ki dar gi gwo jin gamu is mo tani a/a’di imina gwo jin gamu is ma Arumgimis i/ush me’d mowa?

⁴Dhalku/ ki ṯosh kan. Waḵka ris ’kwani ’baar ki ’beles ta kun ’koki ta kuŋ gana/ mo tani dhalka Arumgimis ta a’diŋ gana/ mo. Me’d gwo jin ’kwarkunu mo ki: Ki /e mini ’taki ta jim ma ḵar/e ki gwom pini mo dhali ’taki p̱i gwo kun dwallu /e e mo.

⁵Hili waḵki/ mii kun ’koki ta kuŋ ḵar/em bana miina ana mo mmoṯor mo ma ḵar/e ma Arumgimis mo tani i/ana mina o katinta mo? Ka Arumgimis diki ta a’diŋ ḵar/e mo ’taa mmogac̱a a’di anyora p̱o/ ana. (Aha/ ona gwo me’d wathim pa ba/.)

⁶Dhalku/ ki ṯosh kan. Waḵki/ gwo midi ’taki diki wakan mo tani Arumgimis midi ’taki mish ’kwaniny’cesh gwo dwall ’taa?

⁷Hili waḵki/ gwoŋ gana/ ma Arumgimis ishkina monycam piti mo goma ṯor pem mo tani atinta iwaḵkunu aha/ mo me’d wathi/ jin miiki miinthus mo si’da/?

⁸Dhali tonthus ’konuki ’taki mii mo gomata mmomina tom ’boro’di ’taki p̱u’du/ mo sa/? – me’d ’kwanin tiya kun rukunyki ana ki gwo mo mmo/o ki ana i/ona gwo kan mo. Ki mo gi miiwaḵ buni tana ḵar/e mo be.

⁹Dhali katinta si’da/? A/ki ana gun tana ’Kwani Yahuuda/ mo bola bol e ki ’bor mo ’taa? Yisa ki sule/ mo be. Haali/ aha/ hila yer ma ris ’kwani ’baar mo is ki gway mo imonṯal ’de/ mo, ’Kwani Yahuuda/ mo dhali ’Kwaniŋ Griḵi mo, ka ris ’kwani ’baar mo ’kokin mo ’ko’d e mom’bi’th gi miinthus mo be.

¹⁰Me’d gwo kun ’kwarkunu mo cikise/ mo ki: Jaŋ kamu/ jin mii’d ka ḵar/e yisa di’da. Ṯal ’de/ p̱iyi’d mo be.

¹¹Jaŋ kamu/ yisa di’da jin mishi gwo ’ban mo. Dhali jaŋ kamu/ yisa di’da jin ŋap̱ki’da Arumgimis mo.

¹²Aris uni ’baar mo dhereskin ki ’beles mo, aris ’kwani ’baar mo iiki iin thus mo. Jaŋ kamu/ yisa di’da jin mii miim ’boro’da, ṯal ’de/ p̱iyi’d mo be.

¹³’Kus buni wana e ki moŋ’kup̱aje jin ḵa’du ’twa/ mo. Uni tan ka le’d buni kun he’kkina he’k e mo. Ac̱in tasha/ c̱a’bki’d ’ko’da le’d buni mo be.

¹⁴Dhali ’twam buni ’tu’dkunu mo ki monyjeya je mo dhali ḵa/ ma du ki ḵa/ mo be.

¹⁵Sho’k buni dherkin mo mmowola bas mo be.

¹⁶E bway buni jin iikina uni mo tani raḵka’di ’baar mo dhali mii jin miinu miiny c̱iŋkina/ mo be.

¹⁷Dhali bway gi mo ma ḵu’th is mo tani molkina uni mo be.

¹⁸Moŋḵo/ isa kamu/ yisa di’d goma Arumgimis e bwambor jis/em buni yisa.

¹⁹Dhali ana misha shwane/ ki a’di yin jin ona gwoŋḵan jin c̱inu mo tani a’di onu gom uni gwansan kun ’ko ’ko’d e gwoŋḵan jin c̱inu mo. Wakan mo tani ka ris ’twa/ ’baar mo minu ’dap̱ ’twa/ mo gom gwo mo dhala ris ’kwani gi mony’ceshi ’baar mo mini dosh shoka ’cesh goma Arumgimis mo be.