Rom 3:1-19

¹Ra taio a te Juda, anun a kinkinis na te Juda in warut petlani? Ra taio di sa tok talilis tari, anun a kinkinis na tinotok talilis in warut petlani?

²Ra taio a te Juda i wakak doko toromi. A mugano utna ut, o God i sa ubek tar anun a wasiso una laman a taro Juda.

³I pepetlai ra ara taro Juda ka det nurnur? Ra ka det nurnur, pepetlai, i topasi sur in turbat o God sur gong i pam sot anun a wasiso?

⁴Awu ut! Ra a taro rop det in torotoro, a wasiso anun o God i lingmulus ut. Elar nama wasiso torom o God ra di sa tumus tari una Buk Tabu lena, “Anum a wasiso na warkurai i ese i lena u tokodos. Ma ra din takun ui, ka din sio pas tu niraro.”

⁵Ra dat pam a sakino, anundat a sakino i ese mulusi lena, o God i tokodos. Pepetlai, o God i raro sur in warkurai dat uni? Awu ut! A ngas na wasiso ra, i wanpat tan a taro kut. Gunuk ra anun a warkurai ke tokodos, ken warkurai lar pas a taro tagun a rakrakon bual. Ikut i tokodos ut, ra in pet lar pasi sur in warkurai det.

⁷Kutiro taio in watungi lena, “Ra anung a kum torotoro na wasiso i ese mulusi lena, a wasiso anun o God i lingmulus, ma i ulabo pas a risano, sur asau ra o God i watung iau a tene sakino, ma an iru una nun a warkurai?”

⁸Ara taro det watung laulau met, ma det takun met lena, met ususer a taro lenri, “Dat in pam a sakino sur a wakakino in nanpat talapor.” Ikut awu, ke lingmulus. Det ra det watung a wasiso ra, i sot sur det in iru una warkurai anun o God.

⁹Asau ra dat in watungi una utna ri? Pepetlai, met a taro Juda met tokodos taun a taro gisen? Awu ut! A sa watung tari lena, a kum te Juda ma a taro gisen kai det elar kut. Dat rop dat kis utuntudu ina sakino petutna.

¹⁰Elar nami ra di sa tumus tari una Buk Tabu lena, “Katutaio i tokodos, katutaio ut!

¹¹Katutaio kai ra i mananos. Katutaio i sisio sur o God.

¹²Det rop det sa wan gisen gusun o God. Det rop ka det gas mo un tu utna. Katutaio tagun det i pam a wakakino, katutaio ut.”

¹³“A kum wandet i papos elar nama kum tung na minat, ma a wasiso anundet i elar nama singino na minat. Det ser watung a kum torotoro nama kum karmendet.” “A wasiso tagun a wandet, i elar nama kusmapak na sui ra i ser karot doko a taro.”

¹⁴“A kum wandet i bukus nama wasiso laulau ma i pitar a maut torom a taro.”

¹⁵“Det raras sur det in um doko a taro.

¹⁶Det kamar a kum utna, ma det ban laulau a taro una nundet a kum kisapi ra det wan iai.

¹⁷Ka det tasman a kisapi na malmal.”

¹⁸“Ka det ngara sur o God.”

¹⁹Dat tasmani lena, asau ra a warkurai i wasiso uni, ke wasiso una taro ra awu sur a taro Juda kut, i wasiso una taro Juda utkai, ra det kis utuntudu ina kum Warkurai. I mo ra, a taro rop tagun a rakrakon bual det in tur na warkurai umatan o God, ma kataio in ipul lar pas.