Loma 3:1-19

¹Nenemú Ómasímini agómulaló Zuta vegená leza hetoka vegená kivilegeko noupe. Itó lugupeló Ómasímini anosa nemó nene ha hetá nehe.

²Lá oko nomive. Nenémo haitopaitolíminoko netá gihila neve. Ómasi eza Zuta vegená haitopaitó netá lehizeletonoikutí nene Ómasímini gakó lehizeletamó nenémo iteko neve.

³Itó Zuta vegená lugáa keza Izesukumú gili alévolé amakumú nene nanave litune. Gili alévolé amatímo nene Ómasi eza nónohá zeletative loko lo mola gakó ale ahulokahe.

⁴Óve, lá oko nomive. Vegená mukitó keza sozaló ve minatamóza, Ómasímo eza lokago alévolé oaká ve noive loko gilitune. Nenemú monó gotolaú Ómasimú láa liki gizinamóma neve: Gakó makó nolako, gelekinake, nene gihilave loko gelekinake hize lé itune. Mogonakamú lotuva ligikikoma nene, géisi kiviliginogo ane.

⁵Zuta vegená leza oko moloko nounimó nene hee lamitímo Ómasímini mogona hee limó nenémini mogona ale utó oaká noinazo, nenemú nanave litune. Ómasímini mogona lá oko minokanazo, nenemú eza nogosani limitimó nene etaminogo ive loko litupe. Mikasiuka vete láa liki liaká niamó nenéminoko gakó láa loko nolumóza,

⁶mogonáa lá oko nomive. Ómasímini mogona hee loko minamilina, mikasiuka vegená nana oko goní oletoko nogosani limiline.

⁷Loko lokugo ve makolite láa liki litave: Soza mogonate nenémo Ómasímo gakó lokago alévolé oaká noitímini mogona ale utó okago Ómasímini lapaná ale oteaká noinazo, Ómasímo lihimatemú nanamú goní oletative.

⁸Geí gakó nene gihila netimó nene lihima netá golesa loló oloko vosakutí Ómasímo miluma geleletatímo lelitoka vaí okiko agepoka lituni netá lamaná goha utó itive liki litave. Nenikumú nene láa loko loaká noane liki lotoka hiziki avetó iki lili ali iaká niave. Némika liki liaká nia vegená nene Ómasímo hee loko goní oketanogo ive.

⁹Nenemú nana ive. Ómasímini agómulaló Zuta vegenalita hetoka vegená kivilegeko noupe. Nenémini oko nomive. Zuta vegenaki hetoka vegenaki leza mukitó lihima netalímini gelekeleláa noune loko lo utó oko lo lekemekuve.

¹⁰Nenémini mogonamú monó gotolaú gakó makó lá oko neve: Ve makolímo hee hee loko minamive, keké.

¹¹Makolímo gele vevesoko minamive. Makolímo Ómasimú sele loko vitagá osá amive.

¹²Mukitó Ómasímini kemegesa amikave. Pisila nomimokó niave. Makolímo hee loko oko moloko osá amive. Ma nomive keké.

¹³Kigikagutí gakó golesa iteaká noimó nenémo gonosi anuva nenéminoko neve. Genezáini nenémo ali viligá aligá ikago, kogoka kagaka vizeaká gakó iteaká noive. Kegepagutí nene gipe lakegusa gakó utó oaká noive.

¹⁴Kegepagú nene usí vizeaká gakó, ekesá gakó vávani oko utó oaká noive.

¹⁵Lova ali utó iki kipilinigi kigisa agilaló lisiaká niave.

¹⁶Mihina atoka vauna hizeaká noive.

¹⁷Hulu gapo lamaná nene gili vevesisá amave.

¹⁸Ómasimú lelegesá ligitive liki kagata gilisá amave.

¹⁹Itó láa loko geleaká noune: Monó gotolaú gakó gizinamó nenémo Ómasímo lo huka gakó amelagitoka vo aleaká noive. Lá okago nene, vegená mukitoka mogonate lotuva legekago, gakó litunimoláa nomive. Itó Ómasímini avogisaló mikasigú vegená mukitoka lihimategi noune.