Romanos 3:1-19

¹Cha ba kwian israelita ulita ta gbe chke ai giti: Ba kwian israelita suia mo kwara sidri tkangenga, agwa e giti ba me chege Chubenu, Chube gwage kwian israelita me israelita ulita talladi kwian ulita talla mine Chube ole, e giti ba ulita israelita ñage geru kade moge: “¿Lledale cha mo kwara sidri tkangenga? ¿Mineade ma no cha kwian israelita chudalla alin kwian me israelita chudallage?”

²Sugedale ba ulitage Chube agedu tanre no kwian israelita ulita alin, ngeru Chube kwian israelita gau Chube mo gerua ketu kwian israelitage, geru e jo degaba, kwian israelita geru e molen, kwian me israelita me geru e molen, geru e giti ñage suge trate kwian israelitage chagedale mine Chube ole.

³Kwian israelita Chube gerua molen agwa kwian israelita ulita me Chube gerua gai ulia me age Chube gerua gerule kare, ¿e giti Chube be mo ta blite nganake Chube mi age Chube gerule kare?

⁴Me dale, Chube be chege diali ama gerule kare. Kwian ulita ñage sole agwa Chube gerule ulia diali. Chube gerua degaba unsuialin gerule Chube me sole giti, chada e gerule: “Chube diali chege trate, ama age ulita ama gerule kare, ama me sole. Kwian gweale gerule: ‘Chube me gerule ulia’, kwian gerule ene kwian kle gerule ngwale, kwian me ñage Chube gbe jiske, Chube no trate, Chube gerule ulia diali.” Chube gerua degaba gerule ene Chube giti.

⁵Che age me no Chube dollale gire suge trate che tale Chube no Chube age no ulita diali, e giti kwian tañachuge mo tale: “Cha age me no giti suge kwian nage Chube alin allabi no Chube age no ulita diali, e no malen Chube me ji gbadale cha alin cha age me no ulita gdale.” Me no tañachuge ene, Chube me ji gbe che alin che age me no gdale, ñage suge chege kaire kwian nage Chube no che kle age me no ole, Chube ene ama mi ñage gerule chui bdaglige kwian ulita giti bai jiske bai me jiske, agwa Chube me ene, Chube diali trate, Chube me age me no ni sidri, malen ama kwian agenga me no gbe jiske.

⁷Kaire kwian tañachuge mo giti mo tale: “Cha diali me gerule ulia, cha diali sole, ene cha giti suge kwian nage Chube alin allabi gerule ulia diali, kwian enege suge Chube ene malen ama gerule no no Chube giti, e ene ¿mineade Chube kle cha gbe jiske sole gdale?, ¿mineade Chube gwage cha agenga me no?”

⁸Kwian tañachuge ene ama kle tañachuge ama age me no giti ama kle Chube chudaboi, ama tañachuge ama age me no giti kwian na kle mo ta gbe ma no Chube ole, e ulia kwian e tañachuge kare ¿mineade che ulita me age ulita me no diali? Agwa me ene, kwian e me kle tañachuge no, kwian e me tañachuge geru ulia gerule kare. Kwian ene ulita alin Chube be ji gbe, kaire Chube be ji gbe kwian alin kwian kle geru jinade ngwale cha dollale, kwian e kle gerule me no kwian na ole cha giti kle gerule cha kle kwian tke tangle kwian ai kle tañachuge kare.

⁹¿Che kwian israelita mine Chube gwage? ¿Che ñage tañachuge che ma no kwian na me israelitage? E me ene, cha gerudu kare ngeru, Chube gwage che kwian israelita me israelita ulita agenga me no, ulita jiske age me no giti, ni gdaite agali gballa ñage joge siere age me noge.

¹⁰Chube gerua degaba unsuialin gerule kwian ulita giti, chada e gerule: “Kwian ulitaske kwian agenga no me, ni malen kwian gdaite age no, ulita agenga me no.

¹¹Kwian ulita me Chube uñe, ni gdaitege suge Chube mine, ni gdaite tañachuge chage Chube ole age Chube takalin kare.

¹²Kwian ulita mo ta gbu chage age me no sugekare Chubege. Kwian ulitaske kwian agenga no me, ni malen gdaite age no, ulita agenga me no.

¹³Diali kwian gerule me no sugaska, diali kwian gerule sole, ka me skate gerule me no dabadi.

¹⁴Kwian ta skochie tanre, ta skochie ole ama daba oña boi tanre me no.

¹⁵Kwian me no daba na ole, diali ama kle biale daba na gweda.

¹⁶Baini kaire kwian joge ngwadi kwian ene age me no daba na ole, kwian ene daba na gbe ta olire tanre boi daga ngwale.

¹⁷Kwian ene diali tañachuge age me no alin giti daba na ole, kwian ene ni tañachuge sidri daba na ta gbe nga suga no giti.

¹⁸Kwian ulita age me no ene, kwian ulita ene me mo ta dbe kwachie Chube ngeru ama kle age giti.”

¹⁹Chube gerua degaba unsuialin gerule ene kwian ulita giti, geru e jo degaba che kwian israelita ulita alin, geru e giti chke uñale che kwian israelitage kwian israelita me israelita ulita agenga me no, ulita jiske Chube gwage, ene ni kwian gdaite ñage gerule: “Cha me agenga me no, cha me jiske Chube gwage.” Ulia kwian ulita agenga me no, kwian ulita jiske Chube gwage.