Lom 3:1-19

¹Ke, om nambêênja Anutu-te samu samu neep vu hil Yuda kaluuh hil vaalu mava? Tonde va sen dalaah naavind in taato naambe Anutu-te hil sil-ato ond datovu vaati nivasa lak?

²+ o 3:2 Saam 147:19-20; Lom 9:4*Ham hil-e, samu samu ngeeyaata neep. Ti nambe Anutu vu yite vakasin vu hil Yuda in nambe sil daapuvu.

³+ o 3:3 Lom 9:6; 11:29; 2Ti 2:13*Keen, lemu sil vaalu me-lawii-having Anutu-te vakasin-anjo le. Om nambe vaatii-jo? Malis, silate vakasin kalêêsin-anjo me-le biing-ambe Anutu tatuhin yiiy e, nganjo yik Anutu yoo le biing gaving yite vakasin-ambe nôôn jak.

⁴+ o 3:4 Saam 51:4*Keen, hil pin oo danêêl vakasin tatuhin, lemu sil-ame le lambiing-ambe Anutu me-le gilin e, nganjo Anutu yoo le monaanêêl vakasin keen danggata osin danggata nohvu yite vakasin sen neep hôôk kaapiyaa-to nambe, “Gate vakasin pin oo nivalok lôôt, om naambe vaheey lambiing vakasin vu hong ond gale savok sil.”

⁵Om yale naanêêl vaati? In hil dayi nambe yiiy naawiing va nipaya, tombe manyinjo navêêl sil alund ak nambe Anutu ond yi omaaho nivalok. Om sen yate nipaya nawiing-ambe hil akand navu Anutuu-to, ond mak yiiy naanêêl naambe me-lohvu nambe Anutu bu nyevahaan dukanaah yate va nipaya le mava? Manyinjo sa sapa hôôk omaahonôôn akand-ambe saanêêl amu.

⁶Ôôye, me-nambêênjo le. Naambe Anutu me-bu nyevahaan dukanaah yate va nipaya le, ond me-lohvu nambe sahi hil pin-ate vakasin-ambe bu nyevahaan vu sil e.

⁷Tonde naambe sate vakasin tatuhin bêêl hil alund jak-ambe kand bu Anutu-te vakasin keen, tombe mem sil gako Anutu haale jak lôôt, om sen sate vakasin tatuhin wiing-ambe hil lako Anutu haale lak, ond mak me-lohvu nambe Anutu naanêêl sa naambe omaaho nipaya mava? Hamambe me-lohvu nambe bu nyevahaan dukanaah vu sa le?

⁸+ o 3:8 Lom 6:1,15*Hil-e, mak naambêênja ond yale naanêêl naambe, “Ham-o, yiiy aambiing va nipaya ond mem yale naatovu nôôn anivasa jak.” Tombe yik hil vaalu danêêl vakasin tatuhin lak hey naloh nanye nambe hey oo naanêêl nambêênjo, le ma, om hil-anja sil oo le gako nyevahaan dukanaah silate vakasin tatuhin-anja be nohvu.

⁹+ o 3:9 Lom 1:18–2:24; 3:23*Om nambe vaati? Mak hey Yuda nivasa kaluuh hil ango? Malis lôôt. Yik saanêêl lung la nambe yiiy pin aahulis va nipaya baambu, hey Yuda de ham vaalu osin hil pin sen ham-ame Yudaa-to pin lôôt.

¹⁰+ o 3:10 Saam 14:1-3; 53:1-3; Ekl 7:20*Yik lohvu Anutu-te vakasin neep hôôk kaapiya nambe, “Omaaho nivalok ti me-nando le, malis lôôt.

¹¹De omaaho ti me-lak Anutu ni le, tonde ti me-navu salo Anutu in nambe naatokak e.

¹²Hil pin laloh paya in Anutu-te mopaatôôv anivalok, tonde hil pin osin doos latu hil anipaya valok-ate, de omaaho ti me-nawiing nivasa daka le, malis lôôt.

¹³+ o 3:13 Saam 5:9; 140:3*Tonde silate vakasin anipaya ond lohvu lôôvin sen neep avi natok vu bandumb-ato. Tonde sil dalaand ond navu tatuhin vakasin, de sil avind ond nyêêy-ate palaas anipaya nando hôôk.

¹⁴+ o 3:14 Saam 10:7*Tombe davu talôôt hil osin danêêl vakasin anikalin lôôt.

¹⁵+ o 3:15 Pro 1:16; Ais 59:7-8*Tonde latup-ambe lala pavis in nambe lanyiis omaahonôôn-ambe lanjimb.

¹⁶De taaku pin sen sil dalaa-to ond mondawiliyak va yuuh ame osin davu nimeen ngeeyaata lôôt vu omaahonôôn.

¹⁷Tonde sil-ame davu sapa hôôk mopaatôôv sen vakasin melaas-atêêto le,

¹⁸+ o 3:18 Saam 36:1*de sil akand-ame navu be dayêênin Anutu daka le, malis.”

¹⁹Keen, de yiiy oo alak ni nambe vakasin pin sen tanasin nêêl-ato ond lak hil sen dahulis tanasin baambuu-to, om omaaho ti me-lohvu naanêêl yi naambe yi omaaho nivalok e, malis lôôt. Tombe omaahonôôn pin e lanjak ni naambe nipaya neep vu sil ti ti pin, om sil e gako nyevahaan jak silate va nipaya.