ROM 3:1-19

¹A cang caco, Juda cawngsaw tah Gental cawngsaw navy tah chahnainah aa hmuh vypaw a ung maw? A cang ly leh cingpa a tai cawh sang a tlenah ze chang a ung maw?

²A phingphing tah a hlupui a ung thlang! Ma hrong letei a hmetaw caipaw cawh Khazing tah a bia khah Juda cawngsaw a kai sahpaw he khah a cang.

³Thaikhehpaw tah zingnah hnui lytah ung my he seh la zekhatamaw a cang a? Ma rawng taco Khazing zingchuinah khah zelypaw tah a cangsah a maw?

⁴Cang hrahring be, kaa zongmingtei tah hing bia a reipaw kaa cang tahmai Khazing cawh zingawh a tlah thly thly thlang. Capathai tah, “A reipaw bia cawh bia dih a cang tatah palang cang a ka, sua aa ca khing tihtah na bia khah na te a,” tatah a tahpaw hrakhei a cang.

⁵Ahmang lypaw kaa tuapaw tah Khazing tei ahmangpaw hming a tuapaw khah a se vy syly tah a langsah my seh la saw, zemaw kaa rei khy a? Khazing tah kaaning khah dang a ma tah tihtah a pa maw? (Meh thaikheh tei aa reipaw khah ka reipaw a cang.)

⁶Cang hrahring be! Khazing cawh ahmang lypaw tei a cang caco, zekhatamaw khazaw cawh bia a ce khy a?

⁷Pakhehkheh tah, “Hing bia ka reipaw tahei Khazing zingchuipaw a cangnah le a rungnawnah a sangsah vy caco, zecawtamaw mehsua tatah thaily cangsah ka cang?” tatah bia einah a hnui khy.

⁸“Chahnah a chua khy nápawtah chahlynah khah tua he peh,” tatah zemaw kaa tah thlang be? Ma hrahring cawh a reipaw a cang tatah mehthaikheh tah ka thaichia khah aa rei. Ma hapaw cawngsaw sahlo cawh sua phosah a tlahpaw a cang he.

⁹A cang caco zekhatamaw bia kaa pachang a? Aaning navy tah ka chah vy hlui he peh maw? Chah vy hrahring bei peh! Ka rei ciapaw hrakhei Juda cawngsaw le Gental cawngsaw a lo thlang he. Suanah rai letah a ungpaw longtei a cang he.

¹⁰Capathai chung letah, “Mehding pakheh hmai ung bei he.

¹¹A hnihthaipaw pakheh hmai ung bei he, Khazing a huipaw ahohmai ung bei he. Khazing a huipaw ahohmai ung bei he.

¹²Mehnung vytei cawh lang pave thah he ka, aa zongming teitah hmokheh tah mai hnui ly a cang he. Chahnah a tuapaw ahohmai ung bei he, pakheh tei hmai ung bei he.”

¹³“Aa rong sahlo cawh kha lypaw athlai hratah cang ka, aa lui sahlo cawh dungkheinah tah aa hmang,” “Aa hmo sahlo taitah pari cangmai sichia a pia.”

¹⁴“Aa hmokaw cawh chiasahnah le biachia biahru long teitah a chih.”

¹⁵“Male thisai va chua leco a catlei ngetei he.

¹⁶Aa seinahpaw langpui maikaw letah rorangnah le male lungsawnah aa va tua lai.

¹⁷Denah langpui khah hnih bei he.”

¹⁸“Aa mehhme letah Khazing cizawnah zong khah ung be,” tatah a tahpaw hrakhei a cang.

¹⁹Phungbia tei a reipaw cawh phungbia rai letei a ungpaw he aa cawtah a reipaw a cang, takhah kaa hni. Ma hratei a cangpaw cawh ming vytei tah thai aa cangnah bia zehmai rei ruapaw aa hnui ly nápaw le khazaw pungpaluh heh Khazing biacenah hme letah a daw a takhah a lang khy nápaw cawtah a cang.