ROM 3:1-19

¹Eri, ia duwe, mie mehkot me mehn Suhs akan kin paieki laudsang mehn liki kan? De mie katepen iang sirkumsaisla?

²Mehlel kowahlap, ni soahng koaros! Keieu, Koht ketin likihong mehn Suhs akan sapwellime mahsen.

³Eri, ia duwe, ma ekei irail sohte loalopwoat? Met pahn wehwehki me Koht sohte pil pahn loalopwoat?

⁴Soh kowahlap! Koht uhdahn pahn mehlel, mehnda ma aramas koaros me likamw. Nin duwen me Pwuhk Sarawi mahsanih: Omw pwung uhdahn pahn sansalda ni omw pahn koasoi; ke uhdahn pahn pweida ni ahnsoun omw ale kadeikpomw.”

⁵Eri, ia duwe, ma atail wiewia sapwung kan kasalehda mwahu sapwellimen Koht pwung, dahme kitail pahn patohwan? Dene Koht kin ketin wiahda me sapwung ni eh kin ketin kalokei kitail? (Met I wia peidek ehu me aramas kin wia.)

⁶Soh kowahlap! Ma Koht me sapwung, ia duwen eh pahn kak ketin kadeikada sampah?

⁷A ia duwe, ma ei likamw pahn kapwarehda lingan en Koht oh kasalehda mwahu sapwellime mehlel? Dahme kahrehda I pahn pakadeingkihda duwehte aramas dipan emen?

⁸Eri, dahme kitail soh kin ndahki, “Kitail wiahda me suwed pwe en kapwarehda me mwahu”? Mehlel, me mie ekei aramas me kin kauwehkihla edei ni arail kin nda me I wiahda sapwung ni ei wia koasoi pwoatet! Eri, re pahn pakadeida, nin duwen me konehng.

⁹Eri, ia duwen kiht mehn Suhs akan, mie mehkot me se paiamwahuki sang mehn liki kan? Sohte! I kasaledahr duwen mehn Suhs akan oh mehn liki kan ar duwepenehte, irail koaros mihmi pahn manaman en dihp.

¹⁰Nin duwen me Pwuhk Sarawi mahsanih: “Sohte mwahn aramas emen me pwung,

¹¹sohte mwahn mehmen me loalokong, de kin kaudokiong Koht.

¹²Aramas koaros sohpeisangehr Koht; irail koaros sapwungalahr; sohte mehmen me kin wiahda mwahu, sohte mwahn mehmen.

¹³Arail koasoi kan me diren widing; likamw tohr me kin pwilsang ni lowarail kan, koasoi keper me rasehng pwoisin en sineik me kin pwilsang ni lowarail kan.

¹⁴Awarail kan me diren keria suwed.

¹⁵Re kin mwadang kamadak aramas oh kemehla;

¹⁶re kin kauwehla wasa koaros me re kin kohla ie.

¹⁷Re sohte mwahn ese dahkot popohl;

¹⁸re pil sohte ese duwen lemmwiki Koht.”

¹⁹Eri, kitail eseier me audepen Kosonnedo koaros kin doakedoake irail kan me momour pahn Kosonnedo, pwe en irehdihsang aramas koaros peikidparail oh kihong sampah pwon pahn sapwellimen Koht kadeik.