Rom 3:1-19

¹Kë ţuŋ keeri di di nayuday apelnuŋ bandukiiŋ? Pwala kaŧëmp paka udooni i?

²Pwo nayuday panuura maakan ; bukal biki Naşibaţi ahankanuŋ iko yi aţupuŋ.

³Kë hënkuŋ? Woli baloŋ ţi baka baanfiyaara, uko mënţ kado Naşibaţi awo aankdo uko wi ajakuŋ i?

⁴Nin, bañaaŋ bŧi bawo i kame kë Naşibaţi aji do uko unjoonanuŋ, kë ñaaŋ najën andoli awo na ŋţilan. Hënk di di *Dayiţ aţiiniiŋ na Naşibaţi aji : « Imeeţana pwo naŧool ţi iko yi ikţupuŋ kafaŋna woli blaţar bawoo. »

⁵Kë woli buţaan di ŋdoluŋ dayuuj bnuura kë Naşibaţi awo naŧool, we uwooŋ wi pţup ba? Woli Naşibaţi adiiman nja udeebul, aankpën ţi pwo naŧool i? Kë nşaaŋ aţiini jibi ñaaŋ najën ajaaŋ aşal.

⁶Name kë mënţ hënk da! Woli aanwo naŧool, hum di akhilanuŋ keeri kawayëş umundu?

⁷Kë wi ŋţilan naan ŋakaaŋ kë manjoonan mi Naşibaţi manwinanaa abot adiiman mndëm mi nul, we ukaaŋ keeri kë nduknaanaa wi njubanuŋ?

⁸Keeri we ukaaŋ kë ŋënhil kaji : « Nawulan ŋdo buţaan, bnuura başë babi? » Aa, bañaaŋ baloŋ badiihën aji nji djukanuŋ uko mënţ. Bakaŋ mënţan baluŋ kakoba kakob ki baŧaaŋanaanuŋ.

⁹Kë we wa keeri? Nja bayuday ŋpel bandukiiŋ i? Nin! Na manjoonan, ddo bi diiman kë bañaaŋ bŧi, bayuday na banwooŋ baanwo bayuday, bawo bŧi bañaaŋ banjaaŋ bajuban.

¹⁰Upiiŧana ţi Ulibra wi Naşibaţi aji : « Nin ñaaŋ naŧool aanwoo, nin aloŋ.

¹¹Nin ñaaŋ aloŋ aanwo na uşal, nin ñaaŋ aloŋ aankla Naşibaţi.

¹²Bañaaŋ bŧi badek Naşibaţi kafeţ, bagakandër aneem. Nin aloŋ ţi aanji do bnuura aandoo wo wo aloolan.

¹³Kaţuţ ki baka kawo ji btuur bi bahaabëşuŋ, pndemënt pi baka paŧum na kaguuru, bawo na bnunk bi upula ţi iduuj.

¹⁴Mntum mi baka manŧum na bkarad na ŋţup ŋjooţ

¹⁵baŧar ţi pfiŋ ñaaŋ.

¹⁶Baji baŧok kabot kaduk pwuţan dko di baţëpaŋ.

¹⁷Baamme jibi bakdoli kawoona ţi bŧiinkar.

¹⁸Bañoom Naşibaţi bnuura »

¹⁹Kë ŋşë me bnuura uko bŧi wi bgah bajakuŋ, baţup na banwooŋ i kaţaş ba, bañaaŋ bŧi bahilna bayomp başë bayikrën kë baduknaana bŧi ţi kadun ki Naşibaţi.