Roma 3:1-19

¹Na sa si leana nia rina tie Ziu hola ni sari na tie Zenitailo? Lopu arilaena tu sa minagu?

²Uve, arilaena hola si pude na tie Ziu; sina kekenu si va ronu nia Tamasa koari na tie Ziu sa Nana zinama.

³Ba vegua be kaiqa arini si loke dia rinaṉeraṉe koa Sa? Be gua asa si vegua, e Tamasa ba lopu kaqu kopu nia sa Nana vinariva egoi koa rini?

⁴Lokari hokara! Be guana kokoha sari doduru tie ba sa Tamasa si lopu boka kokoha. Sina guahe si zama nia sa Kinubekubere Hope: “Sari na tinoni si kaqu va sosodea sapu hinokara sa Mua zinama, meke toṉoto si Goi pa vinaripitui,” gua.

⁵Vegua be sa nada tinavete sea, si va vura va bakala nia sapu gotogoto sa pinitu te Tamasa koa gita? Na sa pule si kote zama nia gita? Lopu toṉoto tu sapu va kilasa gita sa Tamasa si gita? Hoke balabala gua asa sari tie.

⁶Lokari hokara! Be lopu toṉoto sa Tamasa, si vea meke kote boka pitua Sa sa kasia popoa?

⁷Ba be zama guahe si keke tie: “Be sekea rau sa tinarae te Tamasa, si ta dogoro va bakala sapu kopu ni Tamasa sari Nana zinama, pude mani tavahesi. Ba vegua ke korapa ta zutue tie sea tu si rau?”

⁸Ego, vegua mada zama kokoha kekeṉoṉo gua rina tie sekesekei pu zutu gami sapu zama guahe si gami, gua, koa ri mami vina tumatumae sapu guahe: “Mada tavete va kaleana pude mani ta dogoro sa lineana te Tamasa,” gua? Lokari hokara, arini pu zama gua asa si garodi pude tava kilasa koe Tamasa.

⁹Ke vegua, gita na tie Ziu si leana hola ni sari na tie Zenitailo, gua? Lokari hokara! Ele tozini gamu tu rau sapu sari na tie Ziu meke sari na tie Zenitailo si kekeṉoṉo mo. Ta pusi varigara mo pa ṉiniraṉira tanisa sinea si gita doduru.

¹⁰Ura sa Kinubekubere Hope, si zama guahe: “Loke tie si toṉoto, namu loketoṉa hokara!

¹¹Loke tie si gilagilana, lopu keke sapu hata ia sa Tamasa.

¹²Doduru tie si luara pania sa Tamasa; ke sea beto mo sari doduru; loke tie si tavetia gua sapu leana, namu loketoṉa hokara.

¹³Sari ṉuzudia si guana lovu ta tukeledi; meke tale zama kokoha mo sari meadi. Sa poizini tadi na noki variva mate si koa mo pa beru dia.

¹⁴Meke sari na leodi si ta siṉie lineveleve kaleadi hola.

¹⁵Sari nenedi si tuturei haqala la pude va mate tie;

¹⁶meke vasina la gua rini si vata sigiti na vata sunai rini sari na tie,

¹⁷meke sa siraṉa tanisa binule si lopu hite tumae nia rini;

¹⁸meke namu lopu hite matagutu nia rini sa vina kilasa te Tamasa,” gua.

¹⁹Ego, kamahire si gilania gita sapu sari doduru pu zama ni sa Tinarae te Tamasa si ta zamae koa rini pu koa ta kopue koasa Tinarae sana, pude kaqu tava noso sari na vina ririunae tana tie; meke pude sari doduru tinoni pa kasia popoa si kaqu ta pitu koe Tamasa.