Roomu 3:1-19

¹Ko ɓural hongal Yahuudiyanke mari? E ko honɗun woni nafa *sunninegol?

²No mari nafa e ɗi fow. Ko adii kon, daaluyeeji Alla ɗin ko Yahuudiyankeeɓe ɓen halfinaa.

³E ko honɗun si woɓɓe e maɓɓe wonaali sella-findeeɓe? E hara ngal angal sella-findeyaagal maɓɓe ɗuytay goɗɗun e sella-findeyaagal Alla ngal?

⁴Pellet hinaa non! Hay si yimɓe ɓen fow ko fenooɓe, Alla kan ko goongaajo, wano windori non wonde: «Peewal maa ngal no feeɲira konguɗi maa ɗin, nde ɲaawaɗaa woo wonaa fooluɗo.»

⁵Si tawii non angal peewal men ngal feɲɲinii wonde Alla ko feewuɗo, haray ko honɗun wi'eten? Kere si Alla tippinii tikkere makko nden, haray hinaa o Feewuɗo? (Ɗun ko haala neɗɗanke non!)

⁶Pellet hinaa non! Si hinaa ɗun, ko honno Alla ɲaawirta aduna on?

⁷E si tawii fenaande an nden no ɓurtude ɓanginde goonga Alla on fii darja makko on, haray ko fii honɗun min tigi mi ɲaawirtee wa junuubankeejo haa jooni?

⁸Awa ko honɗun haɗi wi'en, wano aybinooɓe goo wi'irta wonde hiɗen wi'a: «Waɗen ko boni, fii ko moƴƴi yo yaltu.»? Donkineede ɓen yimɓe ko ko feewi!

⁹Awa, enen Yahuudiyankeeɓe, ko honɗun ɓurɗen ɓeya? Hay fus! Ko fii en ɓanginii wonde kala Yahuudiyankeejo e mo wonaa Yahuudiyanke no e nder junuubu,

¹⁰wano windori non: «Feewuɗo alaa, hay e gooto non!

¹¹Hay gooto alaa faamu, hay gooto alaa ɗaɓɓude Alla.

¹²Fow ko huccuɓe Alla, awa kadi ɓe fow ko ɓe ɓoyliiɓe, hay gooto alaa wonɗo waɗude ko moƴƴi, hinaa non hay e gooto!

¹³Kononɗi maɓɓe ɗin ko genaale udditiiɗe, hiɓe huutora ɗenɗe maɓɓe ɗen fii janfagol, tuutaaɗe toni maɓɓe ɗin ko tooke mboddi.

¹⁴Kundule maɓɓe ɗen no heewi kuddi e hahhannde,

¹⁵koyɗe maɓɓe ɗen no hawjani hibbugol ƴiiƴan,

¹⁶yeebaare e tampere no ka ɗate maɓɓe.

¹⁷Ɓe andaali ɗatal ɓuttu ngal,

¹⁸awa kadi kulol Alla alaa e gite maɓɓe.»

¹⁹Hiɗen andi wonde ko Sariya on wi'i kon fow ko wonɓe e ley Sariya on wi'aa, fii no kala hunduko ombiree, e no Alla ɲaawira yimɓe aduna on fow.