Romans 3:1-19

¹Ariya, genege gala karuwei nomo fanyimu no ewe genege gala nomonga dada wonga, Juda nere fai fereha waha adadu feiya nigode? Nere genege gala karude waha langa taate dada hilou heigona?

²Magana! Itou no Juda dada hilobainga hogo fere-fere nigai. Amugou wa benou, Itou no Juda nere nomo beele oofawei nomo nigai.

³Ngalenga, nere ila beele waha oojo wegu uwa. Onou wa adadu? Nere huwanyanege ngalenga wegu uwa wonga, waha no Itou ono tuwonga no nomo beele waha ada oojo wona rute?

⁴Gai uwanga uwa. Nere fai oruwanga yaawa beele le-lede, onou wa, Itou no nogonga gai-gai beele ngalenga le-lena. Wa, Itou nomo buk langa lena dorofe. “Itou ne fanyite hilou wahanga ono boni, ne ji kot langa tafa hini. Onodu ne kot langa tafa hinei nomo ninanege isei mata wode wa, ne kot tigini feiyawau ganga.”

⁵Ariya adadu? Ere ebere onowou inyaba waha, no Itou nomo fanyimu hilou malalamu fuwei mata wonga, ere beele adadu lewei nomo? Saini Itou no ere ebere une nomo agou inyaba kabaka higona saini langa, Itou no fanyimu hilou onowei uwa rute? Gai uwanga uwa. Itou no gai-gai fanyimu hilou oojowei uwa wonga, no adadu fai-aita oruwanga nebere onowou haawe nagona? Ninanege onouha waha, ere fai ebere ninagenga.

⁷Wa fai no benou lena waha nomo ninau dorofe. “Ji yame yaawawou beele waha Itou nomo ngalenga beele ono wonga malala heigedu bona, waha no unyi anyaro gai tungawei mata wonga, no adadu ji une fai hibona, no ji agou inyaba kabaka hiyonbona?”

⁸Onodu no beele inyaba waha dorofenga, “Ariya ere onowou inyaba ono wedenga jala waha langa onowou hilou heigonbona.” Nere fai ila ji geefe beele tafa bode benou le-lede. Ji yage beele malalamudu le-leni waha, no beele inyaba waha dorofe. Itou no nere fai waha kot langa tafa nigidu bona, onowou inyaba ono wane onounga, edo agou inyaba kabaka nigonbona.

⁹Ariya adadu? Ere Juda, ere fai-aita ila feiya nigou rute? Gai uwanga uwa. Ere amina leyaha, ere oruwanga une kutau higaiha, ere Juda Grik bagu oruwanga.

¹⁰Itou nomo buk langa beele waha bona benou lena, “Fai ete te no fanyimu hilou ada ono-onona. Gai uwanga uwa.

¹¹Fai ete isou hilou uwau. Itou kuru tungawei nomo fai ete uwau.

¹²Oruwanga jala hilou awaneha. Nere oruwa onouhanga, nere fai inyaba tigini. Nere nebereha ete onowou tigini ada ono-onona. Gai uwanga uwa.

¹³Nere nebere huranege matmat dorofe isebuwai inyina. Nere yaawa beele baingaro le-lede. Onodu nere nebere huranege, fai inyabamu nigei nomo beele bolo nigou, maangi inyaba nomo henowa dorofe.

¹⁴Nere gai-gai fai ila inyabamu nigei nomo beele inyaba lebode, ou nigi-nigide.

¹⁵Nere gai-gai fai ila dunege kotewei nomo bode gurarudu golo-golode.

¹⁶Nere golo bode fai-aita ila nebere agenege auma yafou inyabamu nagei nomo dada ono bode ou nigi-nigide.

¹⁷Nere fai ila bagu huwanyanege etengadu yafei nomo fanyimu ada iside.

¹⁸Nere Itou menanga ada umuge tutude.”

¹⁹Ere isiya, beele oruwanga nuuni beele no onona waha, wa nere fai nuuni beele huuna langa yafade waha ono nigina. Onou waha bona fai ete no benou lewei nomo edo uwa, “Ji fai tigini.” Uwa. Ere fai ha-ha oruwa langa ere Itou ago langa nyabuluwou bagu.