Romanos 3:1-19

¹Na kaiztu aizpa mɨnaka. Dios Judío awaruza nanarɨt akwa, Diosne Judío awaruza, tɨttɨt señal sarɨttuza, circuncisión kirɨttuza, wat iznamtu.

²Uspane Diostas akkwan sappara. An ñancha Diosne usparuza akkwan pit kin nam kit Dios pit chɨhkanara, wantuza kamtananapa.

³Judío awa Dios pit sapparɨtkas, mazantuzne us kaizta aizpa mɨashitchi. Mazantuz us kaizta aizpa mɨashitchikas, Diosne mizurainkas awakanain maizmanazi. Dios kin namtɨt aizpa kimanazi kizmanapas. Watcha Diosne au akwa us kin namtɨt aizpa kinazi.

⁴Diosne mizurainkas wenammanazi. Wan awa pɨrail kaizamtukas, Diosne pailta payu watcha kaiztu. Dios pitta ka parɨt: “Awa Dios paramtu aizpa piankamarawane, awaruzne ‘Dios kirɨt aizpa wan nil i’ kizanazi”

⁵Mɨnpazha ñanta ka kaizshinamai: “Awa pailta payu kwail kimtuasmin, suasne Diosne pailta payu paiña kwail kimtu aizpa wat kulnazi. Suasne Dios kwisha wat akwa, usne nawa ilmanazi,” kizanazi. Sunkana awa mintukanain minman. Dios wan nil kimtu akwa, usne wan kwail kimturuza ilnanazi.

⁶Diosta kain pit kaizman. Diosne mizurainkas wenammanazi. Dios kwail kiratne, usne an sukin kwail kimtuza ilshinamanazi. Dios nil kimtu akwa, Diosne kwail kimturuza uspa kwail kiamtu aizpa kaiznanazi.

⁷Mɨnpazha ñanta kaizshinamai: “Na Dios ɨnintu aizpa mɨmtuchikas, Diosne nawa wan chiwal wat kulnazi. Suasne Dios awara wat kulna kin namtɨt akwa, awane kwisha wari kizanazi. Katmizna Diosne nawa ilnawachi.”

⁸Suntuzne sunkana ñanta kaizamtu: “An akkwan kwail kitpamakpas, Dios an akkwan kwail kimtu aizpa wat kulnapa.” Uspane pɨrail kaizat kit na sunkana kamtamtus kizamtu. Diosne sunkana kaizamturuza watcha naizninnanazi.

⁹Sun akwa Judío awane Judío chi awakin an palichi mai. Judío awaruzkas Judío chi awaruzkas Dios iztakin kawarain mai, Dios u Judío awaruzkas Judío chi awaruzkas kwail kiarɨt kiznarɨt akwa.

¹⁰Dios pitta ka parɨt: “Mɨnminkas nil kisachi.

¹¹Mɨnminkas mɨsachi. Mɨnminkas Diosta saimtuchi.

¹²Wantuzne Dios kuruntu aizpa chɨhkaara. Uspane kwail kiamtu uzamtu. Mɨnminkas wat kimtuchi.”

¹³“Kwail awa parakane, usne paiña pit ɨsak kit kwail pitmin paramtu.” “Uspane pɨrail appamtu. Kamta awara kwatne, pininu akwa irɨnazi. Sunkana kwail paramturuzne awaruza kwail kirɨnanazi.”

¹⁴“Awaruza kwail pit paramtuasmin, sun aliztuzne awaruza kwail kiashimtu.”

¹⁵“Uspane azain ɨamtu, awara aim kiana, awara piantana.

¹⁶Uspane mamaztuza kwail kiashit kit tayalninnamtu.

¹⁷Uspane mamaztuza kalpain uzninnamtuchi.”

¹⁸“Uspane Diosta mɨkiamtuchi. Diosta mɨkiamtuchi akwa, ussa ishkuamtuchi.”

¹⁹Aune Dios paiña pit wantuza ɨninta pianmakpas. Katmizna mɨnminkas “nane kwail kitchish” kizsachi. Pailta awane Dios iztakin kunnat kit sua uspa kwail kiarɨt aizpa nɨjkulanazi.