Rom 3:1-19

¹Tota oangga gai panua Iuda amai ga abada palunga, danga toa rua ne ilua gai madongan?

²Oangga gai panua Iuda amai ga abada palunga, eine kemi tau ngan gai! Ngansa danga kapei ede ga bedane: Deo idol gai Iuda ta amariala ngan ele laulau aea posanga.

³Be oangga gid Iuda edengada lolod matua ngan Deo ele posanga mao, eine madongan? Oangga lolod matua mao, eine ga Deo ele posanga tautaunga itap na?

⁴Mao tau! Goibe panua toa ngada ne timan panua pakakanga ad, be Deo kekelen inasi ele posanga tautaunga somisomi. Eine lalaede mambe Deo ele laulau aea posanga ga bedane, “Deo, posanga toa eao pamadid gau ngan eine tautaunga. Ta oangga panua tiselele lem kadonga ngan pamadidnga gau, eao ga easal gid ngan posanga.”

⁵Be oangga gita leda kadonga sasat ikado ga Deo ele kadonga tutui iuot masaeai tau, eine ga takeo mado? Oangga Deo ipanas gita ngan leda kadonga sasat, eine ele kadonga toa ne itutui mao na? Mao tau! Deo ele kadonga itutui. (Betanga toa ne inasi gid eababa led buobuonga.) Oangga Deo inasi kadonga tutui somisomi mao, eine ga irangrang ngan ipamadid gid panua toa ngada ne tanoeai ngan posanga madongan?

⁷Be eaba eta ga iselele posanga toa ne ta ikeo ga, “Oangga leg posanga pakakanga ikado ga Deo ele posanga tautaunga iuot masaeai tau ga ieda iuot kapei, ikamado ga ipanas gau mambe eaba kadonga sat aea?”

⁸Posanga sakirkir toa ne eine lalaede mambe posanga sakirkir ede pade ga bedane, “Goibe, takado kadonga papaeamao, ta ngan edap toa ne, kadonga kemikemi ga iuot.” Panua edengada tiselele gai sapaean ta tikeo ga gai apapaoatai gid panua toa bedaoa. Be eine mao. Gid panua toa bedaoa, Deo ga ipanas gid tutui ngan led kadonga.

⁹Tota takeo mado? Irangrang ngan takeo ga gai Iuda aeasal panua padengada? Mao tau! Patautene tapasolan mambe kadonga sat ibul panua toa ngada ne, gai Iuda ga gid alu padengada pade.

¹⁰Eine lalaede mambe Deo ele posanga ga bedane, “Eaba eta ele kadonga tutui mao ga mao tau.

¹¹Eaba eta ele oatainga kemi mao. Be eaba eta iloilo Deo mao pade.

¹²Gid toa ngada oa tipul murid ngan Deo ta tiuot paeamao. Eaba eta ngan gid ikado kadonga kemi mao ga mao tau.”

¹³“Aoad mambe denga iaoa ikakai, ta led posanga mambe oadoad paeamao iuotot. Somisomi tipakaka.” “Led posanga paeamao eine mambe mota paeamao imau.”

¹⁴“Somisomi tikakado posanga paeamao ngan panua padengada.”

¹⁵“Gid manmanae tau ngan raunga eaba ede pade ga imate.

¹⁶Tilalala alele ta tipaeabu ngan panua led madonga, ta led madonga oanaoana tau.

¹⁷Tiuatai ngan edap lolo tarui aea mao.”

¹⁸“Timataud Deo mao ga mao tau.”

¹⁹Be gita taoatai mambe saoa posanga ienono ngan apu, eine ila pagid panua toa timamado gadio ngan apu. Toa bedaoa ta eaba eta irangrang ngan ikarara ei mulian mao. Be panua toa ngada ne tanoeai led idil paeamao Deo imatai ta irangrang ngan tibada panasnga.