Psalms 87:1-7

¹(Korah ko kuriang alo nunga wur bo) Yawe ko wonong duruk laili Zion awote kaolam;

²nu Jacob ko wonong sor suen la ningi, Zion mu nu ninguru ko kueso.

³O Kaem ko wonong, bala ningo ningo ni ko ko balsan.

⁴Kaem iwita balam, “Wonong sor aninga ikisan mu ningi, ani Egypt se Babylonia nunga nunup balik ale, Philistia, Tyre, se Cush mu nunga nunup karogo balik, ale iwita balikko, ‘Sor imi Zion wonong ko kariimet tala,’ maikko.”

⁵Nunguningta, Zion ko iwita balmonko, “Kariimet imi, se kariimet umu, mu Zion ko kariimet tala,” ma balmonko. “Se Kaem Sokel Garagar mu eng am Zion sokel tuokko,” ma balmonko.

⁶Yawe kariimet nunup giok ale nunup duap te mu iwita batagukko, “Kariimet imi Zion wonong ko kariimet.”

⁷Se nuna wur ilumon ale iru seseka se balmon, “Ana nanga mel ningo ningo suen la mu Zion ningi bulowolok maso ale taiso,” mamonko.