Mbouŋ to Yes Israela 87:1-7

¹Yoova tau ipamundigin ndug toni izi lolooz toni patabuaŋ.

²Ye lolo pa ndug Zion kat ilib pa ndug naol to Yakop papaghu toni tinepneep ila.

³O Yerusalem, yom Maaron ndug toni. Tauto tamtoghon tipait varum kat.

⁴Maaron isaav ighaze: “Yes Isipa ve Babilona pale tiwatag ghou, ve nawaat di tamtoghon tiou. Ve you pale nasaav pa yes Pilistia, yes to ndug Tiro, ve yes to Etiopia paam tovene: ‘Yam anim Yerusalem tamtoghona, raraate inimale yes to tipoop di izi sualen.’”

⁵Onoon kat, pale tisavia ndug Zion tighaze: “Maaron Tiina To Ilib Pa Ndimaronŋa Tisob, ye igham tamtoghon to ndug naol tinim Yerusalem tamtoghona. Ndug tonowen, ye tau ipamundigini.”

⁶Tovenen sawa to Yoova imbood tamtoghon toni izadi ila rau, ye pale imbood saveeŋ to ipaghazoŋan tamtoghon to ndug naol tonowen ighaze: “Yes paanu tau to Yerusalem.”

⁷Tovenen tamtoghon pale lolodi poia, ve timboumbou ve titortor, ve tisaav tighaze: “A Yerusalem, yom unumale saambu to ya bokbokia izaza pani. Pasa, yom, tauto mbeb popoia katindi tivotvot payei!”