Pisalem 87:1-7

¹Dimaadua guu hau dana waahale damana i hongo di gonduu haga madagu.

²Mee koia e aloho di waahale damana go Jerusalem i nia waahale llauehe o Israel ala i golo.

³Kooe go di waahale damana a God, hagalongo gi nia mee humalia a God ala e helekai i di goe,

⁴“Dogu madagoaa ma gaa hihi gi lala nia ingoo o nia henua ala e hagalongo mai gi di Au, gei Au gaa dau Egypt mo Babylonia madalia. Au gaa dau labelaa digau Philistia, mo Tyre mo Ethiopia gi baahi digau Jerusalem.”

⁵Nia daangada huogodoo ga helekai i di gili o Zion, bolo nia henua huogodoo la ne daamada mai i golo, gei Tangada Aamua Muginua gaa hai a mee gi maaloo.

⁶Dimaadua gaa hihi nia ingoo digau o nia henua ala i golo gi lodo dana beebaa, gaa hai digaula huogodoo gii hai nia daangada donu o Jerusalem.

⁷Digaula e gonigoni mo di dadaahili boloo, “Zion deelaa di gowaa e daamada ai tadau hagahumalia!”