Miti Mânec 69:4-24

⁴Maŋgâŋ qaisocnuŋgopieŋ jaŋere ʒare i qizec susuc‐nane sirickekac. Tâpiri‐jeŋichec jaŋe burec ehuc sipiricnuzo eŋgopieŋ. No wiac moc mi fiuckepo, eha bâtikiepemurâ muŋgopieŋ.

⁵O Anutu, no mutuc epo irec fuŋne manakic, wiac esifuckepo i kâuc mi bakic.

⁶Go woricguhuc jueŋgopieŋ jaŋe nore erâ mi qurutuanʒepieŋ, o Anutu, Tâpiri Ɋuŋɋasaŋ Wofuŋ. Israere Anutu, go wira basac egareeŋgopieŋ, jaŋe nore erâ mimi faio mi fenʒepieŋ.

⁷Nore faio dâŋ fewec â mimi qaqa enarekicne, i gore qâqâiŋne fua‐narewec hâcne.

⁸Qomâfâc‐nane jaŋe mana‐narepie jabane ekopac, neŋgoc‐nanere ɋâricfâc jaŋe ʒâŋe ruruŋnuŋgopieŋ.

⁹Gore ficte erâ bunane ʒoc ʒarâ ʒâfitacnukac, â go musoriŋgueŋgopieŋ jaŋere mumusoriŋzi nore faio fekac.

¹⁰No kiorâ sowa juhuc sahac‐nane bâʒâickepo, eme jaŋe hanecnuhuc musâqorecnumbiŋ.

¹¹No busâqocte erâ mateŋ qonaŋkerâ jupo, eme jaŋe âke sisic enarehuc jumbiŋ.

¹²Ŋic ŋokac jaŋe hae ʒoŋao turerâ nore mu binaŋ eeŋgopieŋ, â waiŋ opâ nâhuc nore ʒoraŋ gae heeŋgopieŋ.

¹³No ine nunumu‐nane, Wofuŋ gorao sorepe hefâekac. O Anutu, buurucge fufusuc fokacte dameŋ ira me ira manatec sâckeha mana‐narezemec.

¹⁴Go jauŋ fârigeheczi baficnutec sohoŋ dodocko mi âte utuckezepac; râsifâc‐nane jaŋeraonec, â opâ ʒâkâŋkonec bataracnuzemec.

¹⁵Rumizi mi qâurucnuzejec, â ʒâkâŋzi mi ɋâcnuzejec, â nombâŋzi mi nâkâcnuzejec.

¹⁶O Wofuŋ, go mana‐narec, aki anonocge aŋacne; bumâteŋ sâkogere erâ norao fohorec.

¹⁷Kiŋaŋŋicge no ʒâŋe maige mi bâsoŋke‐narec, no mezacnukacte biac mana‐narec.

¹⁸Maŋfuŋ‐naneo warerâ firuecnuc, râsifâc‐nane jaŋere erâ rambaŋko râecnuc.

¹⁹Mimi qaqa enarekicne â musoriŋnukicne, i goki mana‐fârekomec; â râsifâc‐nane kâuc mi bacjopakic.

²⁰Mimizi ŋecnukume bunane herickekac, busâqoc mana‐nareniŋte ʒâŋe fipo, erâ basapo, bâbâmiriŋ bâfuapemurâ eipiepo.

²¹Nânâre okacne marasiŋ sâqocne narembiŋ, opâre hâmope opâ ʒaʒacne gumecnumbiŋ.

²²Jaŋacne tebozi wiwitic ejarezejec, â tiwâ bâzi‐jeŋiczi bitiŋ ejarezejec.

²³Go ʒâŋe‐jeŋic bâhâpotec tiŋtuŋ qanʒepieŋ, hoqaŋeŋ‐jeŋiczi qiric qârâc qahuc juzejec.

²⁴Aaricge hoŋketec fai‐jeŋicko fezejec, kimbeŋgere ʒocbâruŋzi qâhâsâc‐jopazejec.