SAAMUNƆ 69:4-24

⁴Gbɛ̃ kɛ̀ aↄ̃ zàmagu pãanↄↄ pari dɛ ma mìkãnↄla. Ma ibɛɛnↄↄ lɛ́ vĩro, aↄ̃ↄ yezi wà ma dɛ pↄ́ke wíńnɛ sai. Pↄ́ kɛ̀ mɛ́ɛ à kpãi oroon aↄ̃ bè mà i mà kpáḿma.

⁵Luda, ń ma yↄ̃nkↄyãnↄ dↄ̃, ma taarinↄↄ utɛnannɛro.

⁶Dii Luda Zĩ̀kpɛde, gbɛ̃ kɛ̀ aↄ̃ wɛ́ɛ dↄnziinↄ ǹton tó wí ń kũ ma yãnziro. Isarailinↄ Luda, gbɛ̃ kɛ̀ aↄ̃è n kii wɛtɛnↄ ǹton tó aↄ̃ tↄ́ yaka ma yãnziro.

⁷Zaakɛ n yãnzin mɛ́ɛ mɛnaa kↄ̃n sↄ̃sↄ̃ozi, ben wí gɛ̃̀ ma wɛ́ɛn

⁸Ma gↄ̃ gbɛ̃ zĩ̀tↄ ũ ma gbɛ̃nↄ tɛ́, ma gↄ̃ gbɛ̃ miradodee ũ ma da bɛdeenↄ tɛ́.

⁹N ua yã ma kũ gbãa maamaa, gbɛ̃nↄ dↄkɛnanyo gↄ̃̀mɛ.

¹⁰Tó ma lɛ́ yì pↄsiaa guu, wègↄ̃ ma sↄ̃sↄ̃ↄ.

¹¹Tó ma pↄsia utanↄ fĩ̀fĩma, wègↄ̃ ma faboomɛ.

¹²Gbɛ̃ kɛ̀ aↄ̃ↄ vɛ̃ɛna gãalɛnↄ è ma pe, ígbãamirinↄ è lɛ̀ damao.

¹³Mↄde tó à gↄ̃̀ ma yãnzi, Dii, ḿbe mɛ́gↄ̃ wɛ́ɛ kɛɛmma a gurↄↄa. Ǹ wemala Luda n gbɛ̃kɛ bíta yãnzi, ǹ ma mì sí yãpura.

¹⁴Ǹ ma bↄ foon, ǹton tó mà vlɛ̃ɛnlo. Ǹ ma bↄ í lↄ̀n, ǹ ma sí ma zangurinↄa.

¹⁵Ǹton tó ísↄ̃ ma blero, ǹton tó mà kpáɛ í lↄ̀nlo, ǹton tó wɛ̀ɛ tatamalɛro.

¹⁶Ǹ wemala Dii, zaakɛ n gbɛ̃kɛɛ maa, ǹ aɛ dↄma n sùu bíta guu.

¹⁷Ǹton mìkpɛɛ zu n zↄ̀blerinɛro, ǹ wemala kpakpaa, zaakɛ ma gↄ̃ kagurakɛna.

¹⁸Ǹ sↄ̃mazi ǹ ma mì sí, ǹ ma faaba kɛ ma ibɛɛnↄ yãnzi.

¹⁹Ń ma sↄ̃sↄ̃na dↄ̃ kↄ̃n ma wídammao kↄ̃n ma kpɛbↄnao, nɛ́ɛ gbɛ̃ kɛ̀ aↄ̃ↄ ma kũna yãonↄ ee.

²⁰Sↄ̃sↄ̃na ma swɛ̃̀ zↄ̃̀, ma gↄ̃ gbãaa sai, gbɛ̃ kɛ̀ eé ma wɛ̃nda gwaan má wɛ̀tɛ, mɛ́ɛ ero, gbɛ̃ kɛ̀ eé ma nↄ̀sɛ kpáɛmɛɛn ma wɛ́ɛ dↄ̀zi, à kuuro.

²¹Aↄ̃ ɛ̃zɛ̃ zaaa kàmɛ pↄ́bleen, kɛ̀ ímii ma dɛ, aↄ̃ wɛ̃ kpã̀kpãa kpàma ma mi.

²²Aↄ̃ zĩbaakɛna gↄ̃ńnɛ takutɛɛ ũ à ń kũ à yã lúńnɛ.

²³Aↄ̃ wɛ́ɛ sisi lɛ aↄ̃ton guu ero, aↄ̃ wó gↄ̃ kokona.

²⁴Ǹ n pɛ̃tɛ̃ pitaḿma, ǹ n pↄfɛ̃ pãsĩ pisiḿma.